अमेरिकी राष्ट्रपति चुनाव आउन ४५ दिन, १३ ब्याटलग्राउण्ड राज्यमध्ये १० मा बाइडेनको अग्रता
प्रकाशित मिति : आश्विन ३, २०७७ शनिबार
अमेरिकी राष्ट्रपति चुनाव आउन अब ४५ दिनमात्र बाँकी रहेको छ । तर चुनाव कस्ले जित्छ त्यो थाहा पाउन भने विगतका चुनावको तुलनामा लामो समय प्रतिक्षा गर्नुपर्ने छ । हुलाकमार्फत मतपत्र पठाएर मतदान यसबर्ष अत्याधिक हुने भएकाले चुनावी परिणाममा ढिलाइ हुने भएको हो ।
चुनावी परिणामबारे विभिन्न खाले अनुमानहरु भने आइरहेका छन् । विभिन्न खाले सर्वेक्षणहरुमा जो बाइडेन अगाडि देखिएका छन्, जसरी ४ बर्ष अगाडिको चुनावमा हिलारी अगाडि देखिएकी थिइन् । तर यसपटक फरक के छ भने अधिकांश सर्वेक्षणहरुमा बाइडेन ५० प्रतिशतको नजिक देखिएका छन्, जसका कारण ४ बर्ष अगाडिको तुलनामा डोनाल्ड ट्रम्पको स्थीति खराब देखिएको छ ।
पछिल्लो रियल क्लीयर पोलिटिक्सको सर्वेक्षणमा बाइडेन ४९ दशमलव ३ प्रतिशतमा रहेका छन्, जुन ट्रम्पको तुलनामा ६ दशमलव २ प्रतिशत बढी छ । ४ बर्ष अगाडिको चुनावमा यस्तै सर्वेक्षणमा हिलारीको अवस्था ४४ दशमलव ९ प्रतिशतमात्र रहेको थियो । त्यतीबेला हिलारीले ट्रम्पले झण्डै १ प्रतिशतलेमात्र लिड गरेकी थिइन् ।
कैयन ब्याटलग्राउण्ड राज्यहरुमा बाइडेनको अग्रता झण्डै २ प्रतिशतको हाराहारीमा रहेको छ । रियल क्लीयर पोलिटिक्सको सर्वेक्षणमा फ्लोरियामा बाइडेन ट्रम्पभन्दा २ प्रतिशत प्वाइन्टले अगाडि छन् । फ्लोरिडामा ४ बर्ष अगाडिको चुनावमा हिलारी ४५ दशमलव २ प्रतिशत र ट्रम्प ४६ दशमलव २ प्रतिशतको अवस्थामा थिए ।
१३ वटा मुख्य ब्याटलग्राउण्ड राज्यहरुमध्ये १० मा बाइडेनले लिड गरिरहेका छन् । ट्रम्पले जर्जिया, आयोवा र टेक्सासमा लिड गरिरहेका छन् । बाइड्न फ्लोरिडामा ४९ प्रतिशतको नजिक छन् भने एरिजोनामा ४९ दशमलव २, मिसिगनमा ४७ दशमलव ८, मिनेसोटामा ५१ दशमलव ६, न्यु ह्याम्सशायरमा ४८, पेन्सिलभेनियामा ४९ र विसकन्सिनमा ५० प्रतिशतको अवस्थामा रहेका छन् ।
अमेरिकी चुनावमा मतदान गर्न योग्य अमेरिकीहरुले इलेक्टोरल मतका लागि इलेक्टरहरु छान्नका लागि अमेरिकी इलेक्टोरल कलेजका सदस्यहरुका लागि मतदान गर्दछन् । त्यस्ता इलेक्टरहरुले पहिले नै आफूले कुन उम्मेदवारका लागि मतदान गर्ने भन्ने सार्वजनिक गरिसकेका हुन्छन् । जनताबाट छानिएका इलेक्टरहरुले राष्ट्रपति र उपराष्ट्रपतिका लागि इलेक्टोरल मतदान गर्दछन् । मतदानपछि पूर्ण बहुमतप्राप्त उम्मेदवारलाई विजेता घोषणा गरिन्छ ।
यदि राष्ट्रपतिका लागि कसैले पनि पूर्ण बहुमत प्राप्त गर्न नसकेको खण्डमा प्रतिनिधीसभाले राष्ट्रपति छान्ने र उपराष्ट्रपतिका लागि कसैले पनि पूर्ण बहुमत प्राप्त गर्न नसकेमा सिनेटले उपराष्ट्रपति छान्ने व्यवस्था रहेको छ । जम्मा ५३८ इलेक्टोरल मतमध्ये विजेता हुनका लागि कम्तीमा २७० मतको आवश्यकता पर्छ ।
५० वटा राज्य र वासिंटन डिसीबाट जनसंख्याको अनुपातको आधारमा ५३८ इलेक्टोरल मतको तय गरिएको छ । धेरैजसो अमेरिकी राज्यले प्राय एउटै दलका उम्मेदवारहरुलाई जिताउने गरेपनि फ्लोरिडा, पेन्सिलभेनिया र ओहायोको महत्व भिन्न रहेको छ । यी राज्यहरुले राष्ट्रपतीय चुनावमा आफ्नो अभिमत बदल्दै आएका छन् । तीनको निर्णयले सबै चुनावी परिणाम बदल्न सक्ने भएकाले यी तीन राज्यलाई विशेष महत्वका साथ हेर्ने गरिन्छ ।
सन् २०१२ को राष्ट्रपतीय चुनावमा बराक ओबामाले ३३२ इलेक्टोरल मत प्राप्त गरेका थिए भने मिट रोम्नीले २०६ इलेक्टोरल मत प्राप्त गरेका थिए । सन् २००८ को राष्ट्रपतीय चुनावमा भने ओबामाले ३६५ इलेक्टोरल मत प्राप्त गरेका थिए । त्यतीबेला उनका प्रतिस्पर्धी जोन म्याकनले १७३ इलेक्टोरल मत प्राप्त गरेका थिए । सन् २०१२ को चुनावसम्म आइपुग्दा ओबामाको लोकप्रियता कम भएको थियो ।