अमेरिकामा कोरोना संक्रमण निको भएको एकमहिनामा पुन संक्रमण, एन्टीबडी कति समय रहन्छ ?

खसोखास अमेरिका ब्यूरो

---

प्रकाशित मिति : भाद्र १२, २०७७ शुक्रबार

अमेरिकामा कोरोना संक्रमण निको भएका एकजना व्यक्तिमा एकमहिनापछि पुन संक्रमण पुष्टी भएको छ । अमेरिकाको नेभाडा निवासी २५ बर्षका व्यक्तिमा दोश्रोपटक कोरोना संक्रमण पुष्टी भएको हो ।

परीक्षणका क्रममा ती व्यक्ति दुईप्रकारका कोरोना भाइरसका दुईप्रकारका स्वरुपबाट संक्रमित भएको पाइएको छ । बैज्ञानिकहरुले सुरुमा देखिएको कोरोनाको स्वरुप र अहिले देखिएको कोरोनाको स्वरुप फरक रहँदै आएको बताउँदै आएका छन् ।

गत अप्रिलमा कोरोना संक्रमणको लक्षणहरु देखिएपछि अस्पतालमा भर्ना भएका ती व्यक्ति अप्रिल २७ मा निको भएका थिए । त्यसपछिका दुईवटा परीक्षणमा उनलाई कोरोना संक्रमण नेगेटिभ देखिएको थियो ।

त्यसपछि मे ३१ मा उनलाई कोरोना संक्रमणका लक्षण देखिन थालेको थियो । पाँचदिनपछि उनलाई अस्पतालमा भर्ना गर्नुपरेको थियो भने अक्सिजन दिनुपरेको थियो । उनलाई कोरोना परीक्षण गर्दा पोजेटिभ देखिएको थियो । पुन संक्रमण भएको यो विश्वमै पहिलो केस भने होइन ।

हङकङमा पनि पुन संक्रमणको मामला

एकपटक निको भइसकेका कोरोना संक्रमितलाई चारमहिनामा पुन संक्रमण भएको मामला हङकङमा पनि सार्वजनिक भएको थियो ।
३३ बर्षका ती व्यक्तिलाई झण्डै साढे ४ महिना अगाडि पहिलोपटक कोरोना संक्रमण भएको पुष्टी भएको थियो ।

हङकङ विश्वविद्यालयको रिपोर्ट अनुशार ती व्यक्ति सक्रमणबाट निको हुनुभन्दा अगाडि १४ दिनसम्म अस्पतालमा भर्ना भएका थिए । पछिल्लोपटक विमानस्थलमा गरिएको परीक्षणमा उनमा दोश्रोपटक कोरोना संक्रमण देखिएको थियो । यद्यपी उनमा संक्रमणको कुनै लक्षण भने थिएन ।

एन्टीबडी कतिसमय ?

हालै अमेरिकन सीडीसीले नयाँ निर्देशिका जारी गर्दै एकपटक कोरोना संक्रमण भएर निको भएको व्यक्ति तीनमहिनासम्म सुरक्षित हुने जनाएको थियो । तर यो मामलाबाट तीनमहिनासम्म सबैमा एन्टबडी रहनेमा आशंका उत्पन्न भएको छ ।

सीडीसीले कोरोना संक्रमणबाट निको भएको व्यक्ति तीनमहिनासम्म अरुसँग घुलमिल हुनका लागि कुनै जोखिम नभएको सीडीसीले जनाएको थियो । प्रतिरोधात्मक क्षमता तीनमहिनासम्म कायम रहने पहिलोपटक स्वीकार गरिएको थियो ।

गत जुनमा गरिएको एउटा अध्ययनमा कोरोनाको सामान्य लक्षण भएका वा नभएका संक्रमितहरु निको भएको दुईदेखि तीनमहिनासम्म एन्टीबडी कायम रहने निष्कर्ष निकालिएको थियो ।

एकपटक कोरोना संक्रमण भएको पुष्टी भएका व्यक्तिलाई तीनमहिनासम्म परीक्षणको कुनै जरुरत नभएको सीडीसीले जनाएको छ । तर लक्षणहरु पुन विकाश भएको खण्डमा भने परीक्षण गर्न सुझाव दिइएको छ ।

सार्स र मर्स लगायतका कोरोना भाइरसका एन्टीबडी एकबर्षसम्म कायम रहने बैज्ञानिकहरुको विश्वास छ । सुरुमा कोभिड १९ को एन्टीबडी पनि एकबर्ष कायम रहने विश्वास गरिएको थियो । तर अहिले कोभिड १९ को एन्टीबडी भने छोटोसमय रहने निष्कर्ष निकालिएको छ ।

गत मेमा प्रकाशित एउटा अध्ययनमा कोरोना संक्रमणबाट निको भएकाहरु काममा फर्कनसक्ने बताइएको थियो । तर उनीहरु कति लामोसमयसम्म संरक्षीत हुन्छन् भन्नेबारे केही खुलाइएको थिएन ।

कोरोनाको नयाँ भर्सन जी ६१४ : बढी संक्रमक तर कम रोगजनक

कोरोना भाइरसको नयाँ भर्सन जी ६१४ एकदम छिटो धेरैमा फैलिने प्रकृतिको रहेको तर कमलाई बिरामी बनाउने खालको रहेको एक ग्लोबल अध्ययनले निष्कर्ष निकालेको थियो । शोधकर्ताहरुको अन्तर्राष्ट्रिय टिमले  निकालेको निष्कर्षमा भाइरसको नयाँ परिवर्तित रुपले धेरैमा सहजै फैलिने तर सुरुतिरको प्रकारका तुलनामा कमलाई सिकिस्त बिरामी पार्ने जनाइएको थियो ।

कोरोना भाइरस इम्युनोथेरापी कन्सोर्टिएम र ला जोला इन्स्टीच्युट फर इम्युनोलोजीकी एरिका ओलम्यान सफायरले कोरोना भाइरस मान्छेलाई संक्रमित गर्ने प्रमुख शक्ति भएको बताएकी छिन् । उनले अहिले भाइरसको स्वरुप संक्रमक तर कम आक्रमक र रोगजनक भएको बताएकी छिन् ।

उक्त अध्ययन प्रतिवेदन जर्नल सेलमा प्रकाशित छ ।

कोरोना भाइरसको परिवर्तिन भर्सन पहिलेका भर्सनको तुलनामा बढी संक्रामक रहेको अध्ययनका क्रममा गरिएको विभिन्न खाले परीक्षणहरुबाट पुष्टी भएको छ । भाइरसको अहिलेको स्वरुप फिटर भएकोबारे आफूलाई थाहा नभएको तर पहिलो नजरमा यो त्यती खराब नदेखिएको सफायरको भनाई छ ।

संक्रमित कोषमा जानका लागि भाइरसले प्रयोग गर्ने म्युटेशन संरचनाले प्रोटिन बृद्धिमा असर पार्ने र अहिले शोधकर्ताहरुले भाइरसलाई खोपले नियन्त्रण गर्न सक्ने नसक्नेबारे अध्ययन गरिरहेको जनाइएको छ । अहिले बनिरहेका खोपहरु प्राय स्पाइक प्रोटिनलाई लक्षित छन् तर यी खोपहरु कोरोना भाइरसको पुरानो भर्सनलाई प्रयोग गरेर बनाइएका हुन् ।

शोधकर्ताहरुले भाइरसको नयाँ म्युटेसनलाई जी ६१४ नामाकरण गरेका छन्, जसले युरोप र अमेरिकामा सुरुतिर फैलिएको भाइरसको पुरानो संस्करण डी ६१४ लाई लगभग सम्पूर्ण रुपमा विस्थापित गरिसकेको छ । नयाँ भर्सनले मान्छेलाई सिकिस्त बनाउने दर कम भएकाले यसलाई बेलायतको युनिभर्सिटी अफ वारवीककी प्रोफेसर लरेन्स यंगले राम्रो खबर हुनसक्ने बताएकी छिन् ।

शोधकर्ताको टिमले अमेरिका र युरोपका बिरामीहरुबाट नमुनाहरु संकलन गरेर परीक्षण गरेका थिए भने जिनोमहरुलाई अनुक्रमित गरेका थिए । सार्वजनिक रुपमा नै शेयर गरिएका जिनोमका अनुक्रमहरुसँग तुलना गर्दा शोधकर्ताहरुलाई दुई प्रकारका भाइरसको फैलावट तुलनात्मक अध्ययन गर्न सहज भएको थियो ।

भाइरसको नयाँ संस्करण पुरानोको तुलनामा तीनदेखि ९ गुणा संक्रामक रहेको जनाइएको छ । तर ब्रिटेनमा भाइरसको नयाँ संस्करणबाट संक्रमित एकहजारको अध्ययन गर्दा त्यसको प्रभाव ओरिजिनल भाइरसबाट संक्रमित बिरामीको तुलनामा कम खराब देखिएको थियो ।

भाइरसको नयाँ संस्करणलाई कोरोना संक्रमण भएर निको भएका बिरामीका रगतबाट निकालिने शेरमबाट तटस्थ बनाउन सकिने शोधकर्ताहरुले बताएका छन् । शोधकर्ताको टिमले क्यालिफोर्नियाको शान डिएगोमा कोरोना संक्रमणबाट निको भएका ६ बिरामीले दान गरेको रगतबाट परीक्षण गरेका थिए ।