सरिता गिरीको सांसद पद रिक्त
प्रकाशित मिति : असार २५, २०७७ बिहीबार
समाजवादी पार्टीकी सांसद सरिता गिरीको सांसद पद रिक्त भएको संघीय संसद सचिवालयले जानकारी गराएको छ । संसद सचिवालयले सभामुख अग्निप्रसाद सापकोटालाई समाजवादी पार्टीले संसद सचिवालयलाई दिएको पत्रबारे जानकारी दिएपछि गिरीलाई पदमुक्त गरिएको हो । संविधानको धारा ८९ बमोजिम सांसद गिरी सांसदबाट निष्कासित भएको संसद सचिवालयले जनाएको छ ।
संसदका महासचिव डा. भरतराज गौतमले सांसद गिरीलाई पार्टीले निष्कासन गरेको जानकारी संसद सचिवालयलाई जानकारी गराएको र उक्त जानकारी नियमअनुसार नै पाइएकाले उनको सांसद पद रिक्त भएको सूचना जारी गरेका हुन् । नयाँ नक्शालाई निशान छापमा समावेश गर्ने गरि गरिएको संविधान संशोधन प्रस्तावमा मतदान गर्दा पार्टीको ह्विप उल्लंघन गरेको आरोपमा समाजवादी पार्टीले गिरीलाई निष्काशन गरेको सूचनासहित उनलाई सांसदबाट पदमुक्त गर्न बुधबार सचिवालयमा पत्र पठाएको थियो ।
