अमेरिकी राष्ट्रपतिका लागि चुनाव लड्ने अमेरिकन रयापर काने वेष्टको घोषणा
प्रकाशित मिति : असार २१, २०७७ आईतबार
अमेरिकन र्यापर काने वेष्टले अमेरिकी राष्ट्रपति चुनावमा उठ्ने घोषणा गरेका छन् । उनले भविश्य निर्माण र दृष्टिकोणमा एकताका लागि अमेरिकी राष्ट्रपतिमा आफू उठ्ने ट्वीटरमार्फत घोषणा गरेका हुन् । तर राष्ट्रपति चुनावका लागि स्वतन्त्र उम्मेदवारका रुपमा फाइल गर्ने म्याद ६ वटा राज्यमा गुज्रिसकेको छ भने अरु ७ वटा राज्यमा डेडलाइन नजिकिदै छ ।
शनिबार राती वेष्टले अमेरिकी राष्ट्रपतिमा उम्मेदवारी दिने आफ्नो चाहना ट्वीटरमार्फत व्यक्त गरेका हुन् । वेष्टकी पत्नी किम कादर्सनले पनि अमेरिकाको झण्डा राखेर काने वेष्टको ट्वीट रिट्वीट गरेकी छिन् ।
We must now realize the promise of America by trusting God, unifying our vision and building our future. I am running for president of the United States ??! #2020VISION
— ye (@kanyewest) July 5, 2020
काने वेष्टलाई कोलोराडो, फ्लोरिडा, मिशिगन, मिजौरी, ओक्लाहोमा, साउथ क्यारोलिना र वेष्ट भर्जिनिया लगायतका राज्यमा मतपत्रमा उम्मेदवारको नाम दर्ज गराउनका लागि अझै समय गुज्रेको छैन । अमेरिकी राष्ट्रपतिका उम्मेदवारले संघीय निर्वाचन आयोगमा समेत दर्ता गराउनुपर्छ, जसका लागि कुनै डेडलाइन तोकिएको छैन । अहिलेसम्म संघीय निर्वाचन आयोगमा उनले दर्ता गराएका छैनन् ।
— Kim Kardashian West (@KimKardashian) July 5, 2020
विगतमा काने वेष्टले अमेरिकी राष्ट्रपति डोनाल्ड ट्रम्पलाई समर्थन गरेका थिए, जसका कारण उनले आलोचना समेत खेप्नुपरेको थियो । सन् २०१८ को अक्टोबरमा ट्रम्पलाई भेट्दा उनले मेक अमेरिका ग्रेट अगेनको टिसर्ट र ह्याट लगाएका थिए ।
यसरी हुन्छ अमेरिकामा राष्ट्रपति चुनाव
अमेरिकी चुनावमा मतदान गर्न योग्य अमेरिकीहरुले इलेक्टोरल मतका लागि इलेक्टरहरु छान्नका लागि अमेरिकी इलेक्टोरल कलेजका सदस्यहरुका लागि मतदान गर्दछन् । त्यस्ता इलेक्टरहरुले पहिले नै आफूले कुन उम्मेदवारका लागि मतदान गर्ने भन्ने सार्वजनिक गरिसकेका हुन्छन् । जनताबाट छानिएका इलेक्टरहरुले राष्ट्रपति र उपराष्ट्रपतिका लागि इलेक्टोरल मतदान गर्दछन् । मतदानपछि पूर्ण बहुमतप्राप्त उम्मेदवारलाई विजेता घोषणा गरिन्छ ।
यदि राष्ट्रपतिका लागि कसैले पनि पूर्ण बहुमत प्राप्त गर्न नसकेको खण्डमा प्रतिनिधीसभाले राष्ट्रपति छान्ने र उपराष्ट्रपतिका लागि कसैले पनि पूर्ण बहुमत प्राप्त गर्न नसकेमा सिनेटले उपराष्ट्रपति छान्ने व्यवस्था रहेको छ । जम्मा ५३८ इलेक्टोरल मतमध्ये विजेता हुनका लागि कम्तीमा २७० मतको आवश्यकता पर्छ ।
५० वटा राज्य र वासिंटन डिसीबाट जनसंख्याको अनुपातको आधारमा ५३८ इलेक्टोरल मतको तय गरिएको छ । धेरैजसो अमेरिकी राज्यले प्राय एउटै दलका उम्मेदवारहरुलाई जिताउने गरेपनि फ्लोरिडा, पेन्सिलभेनिया र ओहायोको महत्व भिन्न रहेको छ । यी राज्यहरुले राष्ट्रपतीय चुनावमा आफ्नो अभिमत बदल्दै आएका छन् । तीनको निर्णयले सबै चुनावी परिणाम बदल्न सक्ने भएकाले यी तीन राज्यलाई विशेष महत्वका साथ हेर्ने गरिन्छ ।
सन् २०१२ को राष्ट्रपतीय चुनावमा बराक ओबामाले ३३२ इलेक्टोरल मत प्राप्त गरेका थिए भने मिट रोम्नीले २०६ इलेक्टोरल मत प्राप्त गरेका थिए । सन् २००८ को राष्ट्रपतीय चुनावमा भने ओबामाले ३६५ इलेक्टोरल मत प्राप्त गरेका थिए । त्यतीबेला उनका प्रतिस्पर्धी जोन म्याकनले १७३ इलेक्टोरल मत प्राप्त गरेका थिए । सन् २०१२ को चुनावसम्म आइपुग्दा ओबामाको लोकप्रियता कम भएको थियो ।