सवारी दुर्घटनामा पत्रकार पाण्डेको मृत्यु
प्रकाशित मिति : असार १३, २०७७ शनिबार
सवारी दुर्घटनामा परी रुपन्देहीमा पत्रकार कृष्णबावु पाण्डेको मृत्यु भएको छ । न्यूज२४ टेलिभिजनमा कार्यरत ३० वर्षीय पत्रकार पाण्डे शनिवार राति पौने १२ बजे सवारी दुर्घटना परी गम्भीर घाइते भएका थिए ।
रुपन्देहीको तिलोत्तमा नगरपालिका वडा नं ६ ड्राइभरटोल निवासी ३० वर्षीय कलाकार तथा पत्रकार पाण्डेले आफैँले चलाएको कार दुर्घटनामा परी मृत्यु भएको हाे ।
प्रहरीका अनुसार बुटवलबाट घर फर्कदै गर्दा सिद्धार्थ राजमार्गको ड्राइभरटोलमा उनी सवार कार दुर्घटनामा परेको हो । उनले चलाएको बा७च ६९५९ नम्वरको कार अनियन्त्रित भइ रेलिङमा ठोक्किएर दुर्घटना हुँदा उनी गम्भीर घाइते भएका थिए ।
पाण्डेको टाउकोलगायत शरीरका विभिन्न भागमा गम्भीर चोट लागेको र कार पूर्ण रुपले क्षतिग्रस्त भएको प्रहरीले जनाएको छ ।
घाइते भएका पाण्डेको राती पौने एक बजे बुटवलको चौराहा हस्पिटल प्रालिमा उपचारको क्रममा मृत्यु भएको प्रहरीले जनाएको छ । उनको शवलाई पोष्टमार्टमका लागि लुम्बिनी प्रादेशिक अस्पतालमा राखिएको छ ।
स्थायी घर स्याङ्जाको बिर्घा रहेका पाण्डेको केही वर्षअघि ‘भंगेरी चरीले मैदानमा लरी लरर’ नामको तीजगीत चर्चित भएको थियो । पाण्डे विगत ५ वर्षदेखि न्यूज२४ टेलिभिजनमा कार्यरत थिए ।