एसाइलम अस्वीकृत भएमा संघीय अदालत जान नपाइने सर्बोच्चको निर्णय
प्रकाशित मिति : असार ११, २०७७ बिहीबार
एसाइलम आवेदन अस्वीकृत भएमा संघीय अदालतमा जान नपाइने अमेरिकाको सर्बोच्च अदालतले निर्णय गरेको छ । सर्वोच्चको यो निर्णयले अब ट्रम्प प्रशासनलाई एसाइलम अस्वीकृत हुनेलाई तीब्र गतिमा देश निकाला गर्न ग्रिन सिग्नल प्राप्त भएको छ ।
अध्यागमन अदालतबाट एसाइलम आवेदन अस्वीकृत भएकोदेखि अन्य प्रावधान अनुशार प्रारम्भिक रुपमा एसाइलमका लागि योग्य नभई देशनिकालाको प्रकृयामा रहेका व्यक्ति संघीय अदालतमा जान नपाउने भएका छन् । एकजना श्रीलंकनको मुद्दामा फैसला गर्दै अदालतले यस्तो निर्णय सुनाएको हो ।
ती श्रीलंकनको एसाइलमको क्रेडिबल फियर अन्तरवार्तामा अध्यागमन अधिकारीहरुले उनको एसाइलमको दावी अस्वीकार गरेका थिए । त्यसपछि देशनिकालाको प्रकृयामा गएका ती व्यक्तिको मुद्दा अमेरिकाको सबौच्च अदालतसम्म पुगेको थियो ।
सर्वोच्चको यो निर्णयलाई ट्रम्प प्रशासनको जीतका रुपमा लिइएको छ । ट्रम्प प्रशासनले अमेरिकामा एसाइलममा नाटकीय रुपमा विभिन्न नियम ल्याएर सिमाबन्दी गरिरहेको सन्दर्भमा यो निर्णयले ट्रम्प प्रशासनलाई अझ सहज बनाएको छ ।
यो निर्णयमा सर्वोच्च अदालतका ९ मध्ये ७ जना न्यायाधिसहरुले साथ दिएका छन् । ५ जना रुढीवादी र २ जना प्रगतिशिल न्यायाधिसहरुले यो निर्णयमा साथ दिएका हुन् । यदि संघीय अदालतले अध्यागमन अधिकारी र अध्यागमन न्यायाधिसले लिएका एसाइलमका निर्णयहरुमा पुनरावलोकन गर्न थालेमा तीब्र गतिको देशनिकाला प्रणालीमा भार बन्ने अदालतको निर्णयमा उल्लेख छ ।
हालको नियम अनुशार अमेरिकामा एकसय माइलभित्र पक्राउ परेका र गैरकानुनी रुपमा अमेरिका छिरेको १४ दिनभित्र पक्राउ परेका कागजपत्रविहिनहरु तीब्र गतिको देशनिकालामा पर्नसक्छन् । उनीहरुलाई कुनै अदालती सुनुवाई विना नै देशनिकाला गर्नसकिने प्रावधान रहेको छ ।