अमेरिकामा नेपाली : कोरोनाको पहिलो आर्थिक मारमा रेष्टुरेण्ट व्यवसायी
प्रकाशित मिति : चैत्र ४, २०७६ मंगलबार
अमेरिकी सरकारको डिपार्टमेन्ट अफ होमल्याण्ड सेक्युरिटीको तथ्यांकबाहेक अमेरिकामा ग्रिनकार्डवाहक र नागरिकताप्राप्त नेपालीहरुको संख्या झण्डै डेढलाख रहेको छ । त्यो बाहेक विभिन्न भिसामा रहनेहरु, एसाइलम पेन्डिङ अवस्थामा रहनेहरु, टीपीएसमा रहनेहरु र कागजपत्रविहिन नेपालीहरुको संख्या पनि उल्लेख्य रहेको छ ।
अमेरिकामा कोरोना संक्रमितको संख्या बढ्दै जाँदा त्यसको प्रत्यक्ष वा अप्रत्यक्षमार सबैमा परेको छ । तर सबैभन्दा पहिलो र ठूलो मार नेपालीको रेष्टुरेण्ट व्यवसायमा परेको छ । सरकारले न्युयोर्क, क्यालिफोर्निया, मेरिल्याण्ड लगायतका राज्यहरुमा रेष्टुरेण्ट बन्द गराएका कारण त्यसमा नेपालीहरुका रेष्टुरेण्टहरुपनि उल्लेख्यमात्रामा रहेका छन् ।
न्युयोर्कको ज्याक्सनहाइट क्षेत्र नेपालीको रेष्टुरेण्ट व्यवसायको मुख्य हब हो । न्युयोर्कको ज्याक्सनहाइटदेखि सन्नीसाइडसम्मको क्षेत्रमा एकदर्जन भन्दा बढी नेपाली रेष्टुरेण्टहरु संचालनमा रहेका छन् । ती मध्ये अधिकांश रेष्टुरेण्टहरु मंगलबारदेखि बन्द भएका छन् । कतिपय खुलेका रेष्टुरेण्टहरुले टेकआउट र डेलिभरीमात्र संचालन गरिरहेका छन् ।
न्युयोर्कको ज्याक्सनहाइटमा रहेको चर्चित नेपाली रेष्टुरेण्ट मुस्ताङ थकाली किचनमा शनिबारदेखि नै शटर लागेको छ । सन् २००८ देखि संचालनमा रहेको मुस्ताङ थकाली किचन कोरोनाको त्रासका कारण बन्द गर्नुपरेको छ । संचालक नविन शेरचनले भन्नुभयो हामीले शनिबारदेखि नै रेष्टुरेण्ट बन्द गरेका छौं । व्यापारमा गिरावट आएका कारण रेष्टुरेण्ट बन्द गर्नुपरेको हो । अब कहिले खोल्ने ठेगान छैन ।
न्युयोर्कका मेयर बिल ब्लाजिओले मंगलबारदेखि रेष्टुरेण्ट बन्दको घोषणा गर्नुभन्दा तीनदिन अगाडि देखि नै मुस्ताङ थकाली किचन बन्द भएको हो । सबै स्टाफहरुलाई बिदा दिइएको छ । शेरचनले भन्नुभयो – ‘एकातिर ग्राहकको स्वास्थ्यलाई जोखिममा राख्नु उचित लागेन । अर्कोतर्फ ब्यापारमा निकै गिरावट आयो । त्यसैले बन्द गरेका छौं ।’
थकाली किचनसहित लस्करै रहेका अरु दुईवटा रेष्टुरेण्टमा पनि मंगलबारदेखि ताला लागेको छ । ७५ स्ट्रीटको कर्नरमा रहेको क्याफेमा भित्र बसेर कफी पिउन वा खाना खान रोक लगाइएको छ । तर टेकआउट भने अहिले पनि संचालनमा रहेको छ । यद्यपी टेक आउटका लागि जाने ग्राहकको संख्या भने न्यून रहेको छ ।
न्युयोर्कको ज्याक्सनहाइटमा रहेको लालिगुराँश रेष्टुरेण्ट पनि मंगलबारदेखि लगभग बन्दकै अवस्थामा रहेको छ । यो रेष्टुरेण्टले अहिले टेकआउट सेवा भने संचालन नै गरिरहेको छ । तर डाइन इन सेवाभने मंगलबारदेखि नै बन्द गरिएको छ ।
शिकागोमा नेपाल हाउस र शिकागो करी हाउस नामका तीनवटा रेष्टेरेण्ट संचालन गरिरहनुभएका व्यवसायी बाला घिमिरेले आफ्ना तीनवटै रेष्टुरेण्टमा सोमबार रातीदेखि डाइन इन सेवा बन्द गरिएको जानकारी दिनुभयो । उहाँले भन्नुभयो – ‘तीनवटै रेष्टुरेण्टमा टेकआउट सेवा जारी छ । डाइन इन बन्द हुँदा परेको क्षति टेकआउटबाट कभर हुने अपेक्षा गरेका छौं ।’
त्यस्तै मेरिल्याण्डमा पनि रेष्टुरेण्टहरु बन्द भएका छन् । सिल्भरस्प्रींगमा घर ए कबाबका संचालक लोक तिवारीले आफूहरुको रेष्टुरेण्टमा आइतबार राती देखि नै डाइन इन बन्द रहेको जानकारी दिनुभयो । उहाँले भन्नुभयो – ‘सोमबार हामीले नियमित रुपमा नै रेष्टुरेण्ट बन्द गर्दै आएका छौं । तर मंगलबारदेखि टेकआउटमात्र संचालनमा रहेको छ ।’