अन्यौलमा नेपाली अमेरिकन : नेपाल भन्छ -स्वास्थ्य प्रमाणपत्र ल्याऊ, अस्पताल भन्छ -जाँच्न मिल्दैन
प्रकाशित मिति : चैत्र २, २०७६ आईतबार
नेपालमा जानका लागि स्वास्थ्य प्रमाणपत्र अनिवार्य गरिएपछि अमेरिकामा रहेका नेपाली अमेरिकनहरु मारमा परेका छन् । नेपालमा आफन्त र विजनेशहरु रहेका नेपाली अमेरिकनहरु नेपाल जान नपाएका कारण चिन्तित भएका छन् । कैयनलाई अमेरिकाकै विमानस्थलहरुबाट फर्काइएको छ भने कैयनले टिकट रद्द गरेर बस्नुपरेको छ ।
अमेरिकाका स्वास्थ्य संस्थाहरुले लक्षण नदेखिएका व्यक्तिलाई जाँच्न मान्दैनन् । त्यसैले अमेरिकामा अहिले कोरोना भाइरस परीक्षणको प्रमाणपत्र प्राप्त गर्न सहज छैन । प्रमाणपत्र प्रयोजनका लागि कोरोना भाइरस परीक्षणका लागि स्वास्थ्यसंस्थामा गएका नेपाली अमेरिकनहरुलाई स्वास्थ्य सँस्थाले जाँचका लागि योग्य नभएको भन्दै फर्काउने गरेका छन् ।
‘नेपाल जान हिडेको स्वास्थ्य प्रमाणपत्र नभएको भन्दै विमानस्थलबाटै फर्काइयो ।’ – न्युयोर्कको जोन अफ केनेडी विमानस्थलबाट फर्काइएकी एकजना नेपाली अमेरिकनले खसोखाससँग भनिन् । उनी कतार एयरवेजमार्फत नेपाल जाने तयारीमा थिइन् । उनको टिकटको रकम रिफण्ड हुने नहुने अहिलेसम्म निश्चित छैन ।
त्यस्तै नेपालमा विवाहका लागि जान लागेका अर्का नेपाली अमेरिकनलाई वासिंटन डिसीमा रहेको नेपाली दूतावासले भिसा नदिई फर्काइदिएको छ । कोरोना परिक्षणको प्रमाणपत्र नल्याएको भन्दै उनलाई दूतावासले भिसा नदिई फर्काएको हो । उनका बुबाआमा नेपालमा गइसकेका थिए भने केहीदिनमा नै विवाहको मिति तय गरिएको थियो ।
नेपालले शनिबार रातीदेखि अनअराइभल भिसा स्थगित गरेको छ, जसको सबैभन्दा ठूलो मारमा नेपाली अमेरिकन र नेपाली बेलायतीहरु परेका छन् । विदेशीहरु अहिले नेपालको भ्रमणमा त्यसै पनि जाने योजना नबनाउने भएकाले यसबाट नेपालमा आफन्त, परिवार वा विजनेश भएका एनआरएनहरु नै परेका छन् । विना स्वास्थ्यप्रमाणपत्र भिसा लिन गएकाहरुलाई दूतावासले भिसा नदिई फर्काउने गरेको छ ।
कोरोना परीक्षणका स्वास्थ्यप्रमाणपत्र बनाइदिन आग्रह गर्दा प्राइमरी केयर डाक्टरले कोरोना भाइरसको रिपोर्ट ल्याएमा मात्र बनाइदिनसक्ने नत्र बनाउन नसक्ने बताएको नेपाल जाने योजनामा रहेका एकजना नेपाली अमेरिकनले खसोखाससँग भने । उनले भने – ‘प्राइमरी केयर डाक्टरले रिपोर्ट माग्छन् । स्वास्थ्यसंस्थामा जाँदा कोरोना भाइरस परीक्षणका लागि योग्य नभएको बताउँछन् । अब हामीले कहाँबाट प्रमाणपत्र ल्याउने ?’
स्वास्थ्यप्रमाणपत्र अनिवार्य गरिएपछि तत्काल नेपाल जाने टिकट भएका धेरै नेपाली अमेरिकनहरु अन्यौलमा परेको डिजिटल वानकी कञ्चन केसीले बताइन् । उनीहरु टिकट रद्द गर्ने कि के गर्ने अन्यौलमा परिरहेको उनले जानकारी दिइन् ।
उनले भनिन् – ‘कैयन नेपाली अमेरिकनहरुको अबको केही दिनमा नै नेपाल जाने टिकट छ । अमेरिकामा लक्षण नदेखिएका व्यक्तिको परीक्षण नगर्ने भएकाले स्वास्थ्य प्रमाणपत्र ल्याउन सहज छैन । कतिपय बिरामी बुबाआमा भेट्नेदेखि अत्यन्तै जरुरी काममा जान खोजेका छन् । तर नेपाल सरकारले नेपाली अमेरिकनलाई समेत स्वास्थ्य प्रमाणपत्र अनिवार्य गरेपछि उनीहरु अन्यौलमा छन् ।’
कभर तस्वीर :न्युयोर्कको ट्राभल एजेन्सी डिजिटल वानमा कार्यरत कञ्चन केसी ।