कोरोना त्रास : अमेरिकाका नेपाली व्यवसायी भन्छन् – ‘व्यवसाय बन्द गरौं कि खोलौं अन्यौलमा छौं’
प्रकाशित मिति : फाल्गुन २९, २०७६ बिहीबार
कोरोनाको संक्रमण र त्रास बढ्दै जाँदा त्यसले हरेक क्षेत्रमा नकारात्मक असर पारेको छ । त्यसबाट अमेरिकामा रहेका नेपाली व्यवसायीहरु पनि प्रभावित भएका छन् । उनीहरुले आफ्नो व्यवसाय खोल्ने वा बन्द गर्ने भन्ने विषयमा अन्यौलमा रहेको बताएका छन् ।
अमेरिकामा १६८० जनामा कोरोना संक्रमण पुष्टी भइरहँदा खासगरी त्यसको सबैभन्दा ठूलो प्रभाव न्युयोर्क, वासिंटन राज्य र क्यालिफोर्नियामा परेको छ । न्युयोर्कमा ३२८ जना प्रभावित भइसकेपछि नेपालीहरुका व्यवसायहरु पनि प्रभावित भएका छन् । त्यसको सबैभन्दा चर्को मार रेष्टुरेण्ट व्यवसायमा परेको छ ।
‘शनिबार न्युयोर्क राज्यमा संकटकालको घोषणा भयो, आइतबारदेखि ब्यापारमा निकै गिरावट आएको छ । कोरोना संक्रमणको सबैभन्दा चर्को मार रेष्टुरेण्ट व्यवसायमा परेको छ ।’ – न्युयोर्कको ज्याक्सनहाइटमा मुस्ताङ थकाली किचनका संचालक नविन शेरचनले भने ।
‘डेलिभरी सुविधा हुने रेष्टुरेण्टहरुले त घरमा डेलिभरी गर्छन् होला तर हाम्रो डेलिभरी सेवा पनि छैन । आइतबारदेखि ग्राहकहरु रेष्टुरेण्टमा आउन डराउन थालेका छन् ।’ – शेरचनले भने ।
न्युयोर्कको ज्याक्सनहाइट र आसपासमा १ दर्जन बढी नेपाली रेष्टुरेण्टहरु रहेका छन् । अधिकांशले ब्यापारमा गिरावट आएको बताएका छन् । कतिपयले रेष्टुरेण्ट खोल्दा कर्मचारीलाई तलब दिनुपर्ने भएकाले खर्च समेत धान्न समस्या हुन थालेको बताएका छन् ।
न्युयोर्कमा मात्र होइन, मेरिल्याण्डको सिल्भर स्प्रींगमा घर ए कबाब संचालन गर्दै आएका व्यवसायी लोक तिवारीले ब्यापारमा गिरावट आएको बताएका छन् । गत शुक्रबार अर्थात् मार्च ६ मा मेरिल्याण्डको माउन्टगोमरी काउन्टीमा तीनजनामा कोरोना संक्रमण पुष्टी भएपछि व्यापारमा नकारात्मक प्रभाव चर्को भएको उनको भनाई छ ।
‘वासिंटन राज्यमा कोरोना संक्रमणबाट पहिलो मृत्यु भएदेखि नै ब्यापारमा गिरावट आउन थालेको हो । यही काउन्टीमै भेटिएपछि त ब्यापारमा चर्को असर सुरु भयो ।’ – लोक तिवारीले भने ।
‘कोरोना संक्रमण हुन नदिन हामीले सावधानीहरु पनि अपनाएका छौं । रेष्टुरेण्टमा आउने हरेक ग्राहकलाई आउनासाथ सेनिटाइजर लगाउन दिने र ग्राहक फर्केपछि उक्त टेबुललाई डिस्इन्फेक्ट गर्ने गरेका छौं । बफेबाट संक्रमण बढ्नसक्ने भएकाले अहिललाई बफे पनि बन्द गरेका छौं । अनलाइन अर्डर, होम डेलिभरी र कर्भ साइड पीकअपलाई प्राथमिकता र प्रोत्साहन गरेका छौं ।’ – तिवारीले भने ।
रेष्टुरेण्ट व्यवशायमात्र नभएर अन्य व्यवसायमा समेत कोरोना संक्रमणको त्रासले नकारात्मक असर परेको छ । न्युयोर्कको ज्याक्सनहाइटमा नै अध्यागमन सहायता सेवा प्रदायक लुम्बिनी वर्डवाइड इन्कका स्वतन्त्र पारालिगल मनमोहन सिंह घिमिरेले कोरोनाका त्रासका कारण कैयनले अध्यागमन फर्महरु भर्ने अप्वाइन्टमेन्ट रद्द गरेको बताए ।
‘बाहिर राज्यहरुबाट न्युयोर्क आउनेहरुले र न्युयोर्क राज्यभित्रै बस्नेहरुले पनि सार्वजनिक यातायात प्रयोग गर्न डराएका कारण अप्वाइन्टमेन्टहरु रद्द गरेका छन् । सेवाग्राहीहरु कार्यालयमा आउन नसकेपछि त्यसको नकारात्मक असर परेको छ ।’ – घिमिरेले बताए ।
इमर्जेन्सी बाहेक अन्य सेवा लिनेहरुले अप्वाइन्टमेन्ट रद्द गरेको र आफूले फोन तथा अनलाइनमार्फत समस्याको समाधानको प्रयास गरिरहेको बताएका छन् । उनले भने – ‘अहिले मान्छेहरुले भेटेर एकअर्कासँग कुरा गर्न पनि डराइरहेका छन् । व्यापारको त कुरै नगरौं ।’
हवाईयात्राहरु पनि रद्द गरिएकाले ट्राभल एजेन्सीहरु समेत प्रभावित भएका छन् । हवाई यात्रा गर्न डराएका कारण नेपालीहरुले टिकटहरु रद्द गर्ने र यात्रा पछाडि सार्ने क्रम पनि उल्लेख्य रहेको छ । कैयन देशहरुबाट आउन यात्रा प्रतिबन्ध लागेका कारण पनि ट्राभल एजेन्सीहरु मारमा परेका छन् ।
ज्याक्सन हाइटमा ट्राभल एजेन्सीमा कार्यरत कञ्चन केसीले भनिन् – ‘अहिले ब्यापार ह्वात्तै घटेको छ । टिकट रद्द गर्ने वा स्थगित गर्नेहरुको ओइरो लागेको छ । नयाँ टिकटहरु बिक्रि हुने क्रम घटेकाले घाटाको सामना गर्नुपरेको छ ।’