शिकागोका रेष्टुरेण्टमा नेपाल लेखेको टिसर्ट लगाउँदै ग्राहकलाई नेपाल भ्रमणको निम्ता
प्रकाशित मिति : फाल्गुन ३, २०७६ शनिबार
नेपाल भ्रमणको प्रवद्र्धन गर्न शिकागोमा सामाजिक व्यक्तित्व बाला घिमिरेबाट संचालित रेष्टुरेण्टमा सबै कर्मचारीहरुले नेपाल लेखेका टिसर्ट लगाएका छन् । एसोसिएसन अफ नेपलिज इन मिड वेष्ट अमेरिकाले औपचारिक रुपमा नेपाल भ्रमणबर्षको प्रवद्र्धन सुरु गरेको हो ।
यसै क्रममा रेष्टुरेण्टमा काम गर्नेहरु पनि नेपाल भ्रमण वर्षको टिसर्ट लगाएरै ग्राहकहरुलाई सेवा दिएका छन् । शिकागो करी हाउसमा फरबरी १४ मा कर्मचारीहरुले नेपालको प्रवद्र्धन गर्न टिसर्ट लगाएर काम गरेर कैयन ग्राहकहरुले यसबारे जिज्ञासा राखेका थिए । रेष्टुरेण्टमा आउने ग्राहकहरुलाई यसबारे बुझाउँदै नेपाल भ्रमणको निम्तो समेत दिइएको छ ।
एसोसिएसन अफ नेपलिज इन मिड वेष्ट अमेरिकाका पूर्व अध्यक्ष समेत रहनुभएका बाला घिमिरेले शिकागोमा आफू सम्बद्ध मिशिगन एभिन्युको नेपाल हाउस, डेभोन एभिन्युको नेपाल हाउस र प्लाइमाउथ कोर्टको शिकागो करी हाउसमा नेपालको प्रवद्र्धनका लागि अभियान चलाइएको बताउनुभयो ।
शिकागो करी हाउसमा यो अभियानको सुरुवात गर्दा एसोसिएसन अफ नेपलिज इन मिड वेष्ट अमेरिकाका वर्तमान कोषाध्यक्ष ओम दाहाल पनि हुनुहुन्थ्यो ।
यी रेष्टुरेण्टहरुमा प्राय अमेरिकन र अन्य समुदायका ग्राहकहरुको उपस्थीति हुनेगर्छ । रेष्टुरेण्टका संचालक घिमिरेले सबैको सानो सानो प्रयासबाट नेपालको प्रवद्र्धनमा योगदान हुने भएकाले टिसर्ट लगाएर सहयोग गर्ने कर्मचारीहरुलाई समेत धन्यवाद दिनुभएको छ ।
यी रेष्टुरेण्टहरुमा नेपालको कला, संस्कृति र प्राकृतिक सौन्दर्य झल्काउने विभिन्न चित्र र पोष्टरहरु समेत लगाइएको छ । रेष्टुरेण्टका संचालक घिमिरे विगत लामो समयदेखि नै नेपाली कला, संस्कृति र पर्यटनको प्रवद्र्धनमा संस्थागत र व्यक्तिगत रुपमा सकृय रहदै आउनुभएको छ ।
एसोसिएसन अफ नेपलिज इन मिड वेष्ट अमेरिकाका अन्य पदाधिकारीहरुले पनि आआफ्नो क्षेत्रबाट यसरी नै नेपाल भ्रमणवर्षको प्रवद्र्धन सुरु गरेको घिमिरेले जानकारी दिनुभयो । एसोसिएसन अफ नेपलिज इन मिड वेष्ट अमेरिकाका अध्यक्ष बलराम पन्थी र महासचिव दिवाकर दाहालले सेन्ट लुइसबाट तथा पर्यटन कमिटिका तिलक केसीले विसकन्सिनबाट पर्यटन प्रवद्र्धनका लागि यस्तै अभियान सुरु गर्नुभएको छ ।
