बालुवाटार जग्गामा आफ्नो नाम जोडिएकोमा एनआरएनए उपाध्यक्षको आपत्ति
प्रकाशित मिति : फाल्गुन १, २०७६ बिहीबार
बालुवाटारको ललिता निवास परिसरको संघको जग्गा सम्बन्धी प्रकरणमा आफ्नो नाम जोडेर विभिन्न सामाजीक सञ्जाल र अनलाइनहरुमा आएको खवरप्रति ध्यानाकर्षण भएको एनआरएनए उपाध्यक्ष सोनाम लामाले जनाएका छन् । जग्गा खरिद गर्दा आफू संघको कुनै कार्यकारी पदमा नभएको र तत्कालीन नेतृत्वले नै सबै निर्णय गरेको उनले स्पष्ट पारेका छन् ।
सामाजिक सञ्जालमार्फत उनले भनेका छन् – ‘जग्गा खरिद गर्दा म संघको कुनै कार्यकारी पदमा नभएको र तत्कालीन नेतृत्वले नै सबै निर्णय गरेको हो । म सधै नै संघको हितका लागि निस्वार्थ भावनाले काम गर्दै सधै साथ दिर्दै आएको यहाँहरुलाई अवगत नै छ ।’
हाल पनि आफू संघको लागि कुनै प्रलोभन बिना निस्वार्थ हिसावले काम गर्दै आएको उनले बताएका छन् । कुनै आधार र प्रमाण विना कपोल कल्पित रुपमा आर्थिक चलखेल जस्तो गम्भिर आरोप लगाउनु मान्य हुन नसकने र यो साधारण पत्रकारिताको मर्म विपरीत रहेको उनको भनाई छ ।
यस सम्बन्धमा हुने जुनसुकै छानबीनलाई सघाउन आफू तयार रहेको लामाले बताएका छन् । विना आधार आरोप लगाउने कार्यप्रति सजग रहन समेत उनले सबैमा अनुरोध गरेका छन् ।
उनले भनेका छन् – ‘मेरो नाम राखेर चरित्रहत्या गर्ने नियतले आरोप लगाउनेहरु प्रति कानूनी कारवाही अघि बढाउन सक्ने तर्फ सम्बन्धीत सबैलाई सचेत गराउँदछु ।’