‘जग्गाको पैसा फिर्ता लिएर बालुवाटारको एनआरएन भवन प्रयोग गर्नुको विकल्प छैन’
प्रकाशित मिति : माघ २२, २०७६ बुधबार
बालुवाटारमा एनआरएनए भवन रहेको जग्गा भूमाफियामार्फत खरिद गरेको खुलासा भएपछि सरकारले फिर्ता लग्नसक्ने चर्चासँगै अन्यौल श्रृजना भएको छ । एनआरएनएले उक्त जग्गा साढे १२ करोड रुपैयामा किनेको थियो ।
एनआरएनए कार्यालय रहेको बालुवाटार जग्गाको विषयमा विश्वभरबाट के भएको हो भनेर चिन्ता र चासो व्यक्त भएको भन्दै एनआरएनए अध्यक्ष कुमार पन्तले भन्नुभएको छ – ‘यस विषयमा हामीले मुद्दा मामिलामा नगई एनआरएनए भवन भोगचलन गर्न पाउनुपर्ने भन्दै सरकारसँग माग गरिरहेका छौं ।’
पन्तले सामाजिक सञ्जालमार्फत भन्नुभएको छ – ‘सरकारसँग यस विषयमा पटक–पटक छलफल भइसकेकाले एनआरएनएले जग्गाको पैसा फिर्ता लिने र भवन प्रयोग गर्नुको विकल्प छैन । त्यसैले साथीहरुलाई नआत्तिन अनुरोध गर्दै छिट्टै संघको बैठक बसी आधिकारिक धारणा सार्वजनीक हुने जानकारी गराउन चाहान्छु ।’
यसअगाडि एनआरएनएले बालुवाटारको जग्गा किन्दा आफूहरु ठगिएको बताएको थियो । बालुवाटारको जग्गा लालपुर्जासहित किन्दा पनि सो जग्गा विवादमा रहेको पछिमात्रै आफूहरुले थाहा पाएको बताइएको थियो ।
एनआरएनएले खरिद गरेको उक्त जग्गा भूमाफियामार्फत खरिद गरेको खुलासा भएको थियो । एनआरएनएले २०७२ जेठ १४ गते ललिता निवास क्याम्पाभित्रको जग्गा खरिद गरेको थियो।
यसअघि बालुवाटारको जग्गा फिर्ता लगेमा सरकारले क्षतिपूर्ति दिनुपर्ने एनआरएनएका पूर्व अध्यक्ष भवन भट्टले बताउनुभएको थियो ।