‘नक्कली फेसबुक एकाउन्ट खोलेर बदनाम गर्ने अपराधीलाई बचाउन खोज्नेहरु महाअपराधी’
प्रकाशित मिति : माघ १२, २०७६ आईतबार
एनआरएनए आईसीसीका सचिव गौरी जोशीले नक्कली फेसबुक एकाउण्ट खोली संघमा आवद्ध व्यक्तिको चरित्र हत्या गर्ने सामाजिक संस्थाका पदाधिकारीहरु अपराधी रहेको र अपराधीलाई बचाउन खोज्नेहरु महाअपराधी रहेको बताएका छन् । अमेरिकामा नक्कली फेसबुक एकाउन्टहरु खोलेर एनआरएनएमा आवद्ध लगायत विभिन्न व्यक्तिको बदनाम गर्नेमा एनआरएनए अमेरिकाभित्रकै पदाधिकारीहरु रहेको खुलासा भएपछि जोशीले यस्तो प्रतिकृया दिएका हुन् ।
केहीदिन अगाडि प्रशन्न संग्रौलाले नक्कली फेसबुक एकाउन्ट नै नियन्त्रणमा लिएर त्यसको संचालनमा एनआरएनए अमेरिकाका प्रवक्ता ओम भट्टराई र सल्लाहकार शिव मल्लसंलग्न भएको दावी गरेका थिए ।
यसैबीच एनआरएनए अमेरिकाका अध्यक्ष सुनिल शाहले एक वक्तब्य जारी गरी नक्कली फेसबुक एकाउन्ट बनाएर चरित्रहत्या गर्ने कामप्रति आफ्नो ध्यानाकर्षण भइरहेको बताउँदै सत्यतथ्यको जगमा अगाडि बढ्ने बताएका थिए । यो विषयलाई सम्बोधन गर्न आवश्यक प्रकृया अगाडि बढाइएको पनि उनले जनाएका थिए ।
त्यस्तै एनआरएनए अध्यक्ष कुमार पन्तले त्यसबारे तत्काल छानविन गर्न निर्देशन दिएका छन् । संस्थाको नाम जोडिएर बद्नामी हुने अवस्था आउनु नहुने भन्दै अध्यक्ष पन्तले संघका महासचिव डाक्टर हेमराज शर्मा र अमेरिकाका रिजनल कोआर्डिनेटर राजन त्रिपाठीलाई घटनाबारे तत्काल छानविन गर्न निर्देशन दिएका हुन् ।
घटनामा संलग्न भएको दावी गरिएका व्यक्तिलाई निलम्बन नगरी ढाकछोपको प्रयास गरिएको भन्दै विभिन्न सरोकारवालाहरुले आपत्ति जनाएका छन् । उनीहरुले घटनामा संलग्न भएको भनिएकाहरुलाई निलम्बन गरेर अनुसन्धान प्रकृया अगाडि बढाउन माग गरेका छन् ।