३३ महिनापनि टिक्न पाएन कृष्णाको खुशी

प्रकाशित मिति : चैत्र ६, २०७३ आईतबार

-किशोर पन्थी

त्यो दिन उनी अत्यन्तै खुशी थिइन् । शायद उनको जीवनको त्यो सबैभन्दा खुशीको मध्येको एक क्षण थियो । त्यसैले उनले त्यो खुशीको क्षण शेयर गर्दै भनेकी थिइन् — म अब क्यानडा जाने भएँ नि । अब उतै बिहे गरेर सेटल हुने ।

सन् २०१३ को फरबरीतिर न्युयोर्कको ज्याक्सनहाइटमा उनले यो खबर सुनाएकी थिइन् । उनी खुशी हुँदा मलाई पनि निकै खुशी लागेको थियो । हामी मिल्ने साथी थियौं । त्यसैले साथीको खुशीमा मैले मेरो खुशी पाएको थिएँ । उनी ज्याक्सनहाइटमा संचालन गरेको रोजगार दिने एजेन्सी बन्द गरेर क्यानडा गइन् । र , बिहेर गरेर बसिन् ।

कृष्णा गौतम । उनलाई अगाडि दिदी भनेर सम्बोधन गर्नेहरुले पछाडि नराम्रो सम्बोधन गर्ने गरेको म आफै धेरैपटक सुनेको छु । उनको कद होंचो थियो । तर सपना निकै अग्लो थियो । सपनालाई चुम्ने उडान पनि अग्लै थियो ।

मैले उनलाई राम्रोसँग चिनेको अमेरिका आएको पहिलो बर्षमा हो । विश्वसन्देश साप्ताहिकको बार्षिकोत्सवमा भेट भएपछि हामी दुईचारपटक कफीको लागि भेट्यौं । अनि हामी अत्यन्तै मिल्ने साथी भयौं । कफी गफ, पार्क घुमफिर, मुभीदेखि लन्च डिनर । एकअर्काका मनका कुरा शेयर गर्ने साथी ।

उनलाई मसँग हिडडुल गर्दा निकै भरोसा लाग्थ्यो रे । उनी बेलाबेलामा भन्ने गर्थिन् केटा मान्छेको भरोसा हुँदैन । अलिकति मौका पाउनासाथ मौकाको फाइदा उठाउन खोजिहाल्छन् । तर तपाईको मलाई असाध्यै भरोसा लाग्छ ।

उनले आफूसँग कस्ले कसरी मौकाको फाइदा उठाउन खोज्यो भन्ने कुरा मसँग शेयर गर्थिन्, जसमा न्युयोर्कका केही चर्चित नेपालीहरु समेत छन् । जसको नाम अहिले उल्लेख नगरौं । कृष्णा र म घुम्न जाँदा, भेटघाट गर्दा धेरैले धेरै कुरा गरे । कतिले कृष्णालाई बधाई दिए, कतिले मलाई । तर कुरा आआफ्नो बुझाइको न हो । उनीहरुले जे बुझे त्यही गरे । केटा र केटी राम्रो साथीमात्र पनि बन्न सक्छन् भन्ने कुरा शायद उनीहरुले न बुझेका थिए न भोगेका थिए । त्यसैले हाम्रो सम्बन्ध जुनरुपमा थियो, त्यो रुपमा बुझ्न उनीहरुलाई मुस्किल परिरहेको थियो ।

कृष्णाको जीवन निकै संघर्षपूर्ण थियो । नेपालमा भोग्नुपरेको पीडादेखि अमेरिकामा गर्नुपरेको संघर्ष सुनाउँदा उनी निकैपटक भक्कानिएकी थिइन् । तर उनी अत्यन्तै हिम्मतिली र आँटिलो स्वभावकी थिइन् । जसजसले जे जे भनेपनि आफ्नो काममा लागिरहने उनको स्वभाव थियो । शायद उनको हिम्मत र आँटका कारण नै मसँग स्वभाव मिलेको थियो । र हामी साथी बनेका थियौं ।

उनी आफै संघर्षरत थिइन् । तर पनि मलाई हरेक क्षणमा सहयोग गर्न खोज्थिन् । र गर्थिन् पनि । मेरो सांच्चिका कम शुभचिन्तकहरुमध्येकी एक थिइन् उनी । म पनि उनको शुभचिन्तक नै थिएँ । बजारमा मेरोबारेमा हुने नकारात्मक कुराहरुपनि उनीमार्फत मैले धेरै जान्ने मौका पाएँ । तर बजारमा मेरा पछाडि हुने कुराहरुलाई वेवास्ता गर्ने मेरो बानी छ । वेवास्ता गर्ने मेरो बानीबाट आजित भएर उनी भन्थिन् कहिलेकाँही वास्ता पनि गर्नुपर्छ ।

उनी बिहे भएर क्यानडा गइसकेपछि मैले उनलाई न्युयोर्कमा धेरै मिस गरें । हाम्रो च्याटमा भने कुरा भइरहन्थ्यो । उनी क्यानडा आउन निम्तो दिइरहन्थिन् । आफ्नो श्रीमान् र परिवारसँग पनि उनले म आउने कुराको जानकारी दिएकी थिइन् । मैले पनि क्यानडामा आएर उनका श्रीमान् र परिवारलाई भेट्ने वचन दिएको थिएँ ।

आफ्नै साइजका श्रीमान् भेटेकोमा उनी निकै खुशी थिइन् । दुबैले एकअर्कालाई राम्रोसँग बुझेको कुरा गर्थिन् उनी । उनीहरुको जोडी साँच्चिकै उदाहरणीय थियो । एउटा संघर्षको लामो अध्याय समाप्त भएर वैवाहिक जीवन सुरुवात भएकोमा कृष्णा साँच्चिकै खुशी थिइन् । तर उनको यो खुशी ३३ महिनापनि टिक्न पाएन । उनले आफ्ना श्रीमानलाई गुमाउनुपर्यो ।

क्रमश::

KHASOKHAS EDITORIAL TEAM

Editor-in-Chief : Kishor Panthi
Deputy Editor-in-Chief : Ashmita Khadka
Executive Editor : Anil Adhikari
English Editor: Rajan Thapaliya
Editor: Deepak Pariyar
Editor (Business/US Politics) : Suresh Shahi
Multimedia Editor/Presenter : Kiran Marahatta
Europe Editor: Hari Krishna Panthi
Online Editors: Suraj Ghimire, Bikram Khatri, Aashish Khanal, Dikshya Panthi
Chief Photographer: Dipendra Dhungana
Editor (Empowerment) : Sapana Pariyar

KHASOKHAS TEAM

Int. Representative: KP Neupane(Jackson)
Resource Person: Bishwa Bahadur Shah
Goodwill Ambassador: Yam Baral

Contact Us

© 2021 KHASOKAHS. All Rights Reserved. Namaste International Media Group (worldwide) and Namaste Media Inc (USA)
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com