अष्ट्रेलियामा नेपाली विद्यार्थीले आफूले चाहेजस्तो काम किन पाउँदैनन् ?
प्रकाशित मिति : फाल्गुन १९, २०७५ आईतबार
अष्ट्रेलियामा डिग्री वा अध्ययन सकिसकेपछि छुट्टै उत्साहको सञ्चार हुन्छ । त्यसपछि पूरै समय काममा लाग्न पाउँनुको मज्जा वेग्लै हुन्छ । तर पढाइ सकिसकेपछि पनि राम्रो र खोजे जस्तो काम नपाएर धेरै विद्यार्थीहरु निराश भैरहेको अवस्था पनि छ । विशेष गरेर नेपाल,भारत जस्ता वहुसांस्कृतिक मुलुकबाट आएका विद्यार्थीहरु अझ बढी यस्तो समस्यामा पर्ने गरेको स्वयम् विद्यार्थीहरु नै गुनासो गर्दछन् ।
विज्ञहरुको विचारमा आधारित रहेर अन्तराष्ट्रिय विद्यार्थीहरुलाई काम पाउन कठिन हुनुका ५ कारणहरुबारे यहाँ चर्चा गर्दैछौं ।
अँग्रेजी भाषामा कम दक्षता हुनु
अष्ट्रेलियामा काम पाउन पहिलो आधारभूत योग्यता भनेकै अँग्रेजी भाषा हो । त्यसैले विज्ञहरु भन्छन्–तपाईले काम खोज्न जाँदा तपाईले आइएलटिएसमा पाउनुभएको स्कोरबारे खुलस्त उल्लेख गर्नुहोस् । यसले तपाईको आवेदन स्वीकृत हुने समभावना बढी रहन्छ ।
यदि तपाईलाई आफ्नो अँग्रेजी भाषाप्रतिको दक्षतामाथि आत्मविश्वास छैन भने पनि नआत्तिनुहोला । किन विभिन्न पुस्तकहरु पढेर,नेटमा खोजेर वा घरमा अभ्यास गरेर त्यसलाई बढाउन सकिन्छ ।
कुनै पेशामा दक्षता नहुनु वा पूर्व अनुभवको कमी हुनु
यदि तपाईसँग पहिले काम गरेको अनुभव छैन वा थोरै छ भने पनि तपाईले काम पाउन सक्ने सम्भावना न्यून रहन्छ । यस्तै कुनै कामप्रति दक्षता नहुनेलाई पनि कठिन हुन्छ । त्यसैले यस्ता व्यक्तिहरुले सम्बन्धित समुदाय लक्षित कामहरु गर्नु उपर्युक्त हुन्छ । यस्ता व्यक्तिहरु अँग्रेजी भाषा नचाहिने कर्नर स्टोर,फाष्टफुड चेन र लोकल कम्युनिटी विजनेश जस्ता कामहरुका लागि मात्र योग्य हुन्छन् ।
अष्ट्रेलियाको सिस्टम,रोजगार क्षेत्र वा अन्यबारे कम जानकारी हुनु
करियर एक्सपर्टहरुको सुझाव छ –अष्ट्रेलियामा पहिलेदेखि अर्थात लामो समयदेखि बस्दै आएका व्यक्तिहरुसँग कामको बारेमा सल्लाह र परामर्श लिनु बुद्धिमानी हुन्छ । किनभने उनीहरुलाई अष्ट्रेलियाको सबै सिस्टमबारे ज्ञान हुन्छ । जस्तै कहाँ कस्तो काम पाइन्छ ? त्यहाँको नियम के छ ? भन्नेबारे उनीहरुलाई पूर्ण जानकारी हुन्छ । त्यसैले साथीभाइ र आफन्तहरका अनुभव र सुझाव निकै फलदायी हुनसक्छ ।
अर्को कुरा शुरुमा भोलेन्टियर काम गरेर पनि कामको अनुभव र सम्बन्ध विकास गर्न सकिन्छ ।
सामाजिक सञ्जालको अभाव
अष्ट्रेलियामा नयाँ आउनेहरुले सबैभन्दा बढी अनुभव गर्ने कुरा नै यही हो । यहाँ कसैसँग सम्पर्क नहुँदा अथवा चिनेजानेकाहरु नहुँदा निकै कष्ट भोग्नुपरेको अनुभव धेरैसँग होला । यस्तै जसको साथीभाइ,आफन्त वा इष्टमित्रहरु धेरै छन् उनीहरुले नै काम पनि छिटो पाउँछन् । किनभने उनीहरुलाई खबर गर्ने र चासो,चिन्ता गर्ने धेरै हुन्छन् । यस्तो अवस्थामा एउटा न एउटाले त कामको बारेमा जानकारी उपलब्ध गराइहाल्छ । त्यसैले अष्ट्रेलियामा आएपछि एकलकाँटे वा अन्तर्मूखी बानी छोडेर सकेजति धेरै जनाको सम्पर्कमा बस्नु बढी फाइदाजनक हुन्छ ।
अष्ट्रेलियाको श्रमबजारमा रहेको भेदभाव
सुन्दा वा पढ्दा अचम्म लाग्छ कि अष्ट्रेलियामा पनि भेदभावपूर्ण व्यवहार हुन्छ । तर सत्य यही हो धेरै भुक्तभोगीहरु यसै भन्छन् । अष्ट्रेलियामा विशेष गरेर रंग,वर्ण र अनुभवको आधारमा भेदभाव हुने गरेको छ । कतिसम्म भने तपाईको नामले पनि धेरै फरक पार्दछ ।