एक्स्ट्रा अर्डिनरी स्वीकृत नेपालीले ग्रिनकार्ड फाइल गर्न कुर्ने अवधि ६ महिनादेखि जस्ताको तस्तै
प्रकाशित मिति : फाल्गुन ८, २०७५ बुधबार
एक्स्ट्रा अर्डिनरी आवेदन स्वीकृत भइसकेका नेपालीहरुले ग्रिनकार्ड आवेदन दिनका लागि प्राथमिकता मिति कुर्नुपर्ने अवधि ६ महिनादेखि जस्ताको तस्तै रहेको छ । ६ महिना अगाडि जुन प्राथमिकता मिति भएकाहरुले ग्रिनकार्ड फाइल गर्न खुल्ला गरिएको थियो, अहिलेसम्म पनि त्यही प्राथमिकता मिति नै कायम गरिएको छ ।
सन् २०१८ को जुन १ भन्दा अगाडि प्राथमिकता मिति हुने एक्स्ट्रा अर्डिनरी आवेदन स्वीकृत भइसकेका नेपालीहरुले गत अक्टोबरमा ग्रिनकार्ड फाइल गर्न सक्नेगरी सिमाबन्दी तोकिएको थियो । अहिले पनि सन् २०१८ को जुन १ भन्दा अगाडि प्राथमिकता मिति हुने एक्स्ट्रा अर्डिनरी आवेदन स्वीकृत भइसकेका नेपालीहरुले मात्र ग्रिनकार्ड फाइल गर्न सक्नेछन् ।
अमेरिकी सरकारले मार्च महिनाका लागि जारी गरेको भिसा बुलेटिनमा पनि उक्त मिति अगाडि बढेको छैन । अक्टोबरदेखि मार्चसम्म नै ग्रिनकार्ड फाइल गर्न सक्ने प्राथमिकता मिति सन् २०१८ को जुन १ भन्दा अगाडि तोकिएको छ । त्यो भन्दा अगाडि एक्स्ट्रा अडिर्नरी स्वीकृत भइसकेका नेपालीहरुले तत्काल ग्रिनकार्डका लागि आवेदन दिन सक्थे । एक्स्ट्रा अर्डिनरी आवेदन आई १४० र ग्रिनकार्ड आवेदन आई ४८५ एकैपटक समेत आवेदन दिन सकिन्थ्यो ।
तर सेप्टेम्बर पछि जारी भएका भिसा बुलेटिन अनुशार अहिले त्यो प्रावधान कायम रहेको छैन । यद्यपी प्राथमिकता मिति करेन्ट भएर फाइल गरेका ग्रिनकार्ड आवेदनको सन्दर्भमा निर्णय लिइएको मितिभने केही अगाडि बढेको छ ।
मार्च महिनाको भिसा बुलेटिन अनुशार १ जनवरी २०१८ भन्दा अगाडि प्राथमिकता मिति भएका ग्रिनकार्ड आवेदनका बारेमा निर्णय लिइएको छ । फरबरीमा १ डिसेम्बर २०१७ भन्दा अगाडि प्राथमिकता मिति भएका ग्रिनकार्ड आवेदनका बारेमा निर्णय लिइएको जनाइएको छ । जनवरीमा १ अक्टोबर २०१७ भन्दा अगाडि प्राथमिकता मिति भएका आवेदनमा निर्णय लिइएको थियो । त्यस्तै डिसेम्बरमा १ जुलाई २०१७, नोभेम्बरमा १ अप्रिल २०१७, अक्टोबरमा १ अप्रिल २०१७ भन्दा अगाडि प्राथमिकता मिति भएका आवेदनमा निर्णय लिइएको थियो ।
आर्थिक बर्ष २०१८ को अन्तिम महिना सेप्टेम्बरमा भने १ जुन २०१६ भन्दा अगाडि प्राथमिकता मिति भएका आवेदनमा निर्णय लिइएको थियो । तर नयाँ आर्थिक बर्ष सुरु हुनासाथ यो अवधि एकैपटक १० महिना अगाडि सरेको थियो ।
अहिलेको अवस्था कायम रहँदा एक्स्ट्रा अर्डिनरी स्वीकृत भइसकेका नेपाली ग्रिनकार्ड आवेदकलाई प्राथमिकता मितिबाट ग्रिनकार्ड प्राप्त गर्नका लागि कम्तीमा १४ महिनासम्म लाग्ने अवस्था रहेको छ भने आवेदन दिनका लागिमात्रै प्राथमिकता मितिबाट ९ महिना कुर्नुपर्ने अवस्था छ ।
अहिलेको अवस्था र गति कायम रहँदा उदाहरणका लागि यदि तपाईको प्राथमिकता मिति सन् २०१८ को डिसेम्बरमा छ भने तपाईले ग्रिनकार्ड आवेदन दिनका लागिमात्रै कम्तीमा अझै ६ महिना कुर्नुपर्ने हुनसक्छ भने ग्रिनकार्ड पाउनका लागि कम्तीमा १२ महिना कुुर्नपर्ने हुनसक्छ । तर आगामी भिसा बुलेटिनमा प्राथमिकता मिति बदलिएको खण्डमा यो समय अझ बढी वा घटी पनि हुनसक्छ ।
