फोहरसँगै नवजात शिशुको शव!
प्रकाशित मिति : पुस २३, २०७५ सोमबार
पोखरामा फोहर उठाउने गाडीमा नवजात शिशुको शव पाइएको छ। सोमबार पोखरा–१७, बिरौटाको अन्नपूर्णमार्ग र यज्ञशाला मार्गबाट फोहर उठाएर आएको गाडीमा तन्नाले बेरेको अवस्थामा नवजात शिशुको शव फेला परेको हो।
‘फोहर उठाएर आएको गाडी डम्पिङ साइटमा लगेर फोहर छुट्टयाउने क्रममा छोरा जातको नवजात शिशुको शव तन्नाले बेरेको अवस्थामा फेला परेको हो’, जिल्ला प्रहरी कार्यालय कास्कीका प्रवक्ता डिएसपी रवीन्द्रमान गुरुङले भने,‘ हामीले यो घटनाको गम्भीर अनुसन्धान थालेका छौँ ।’
कुनै निर्दयी आमाले लोकलाजको डरले बच्चालाई मारेर फालेको हुनसक्ने अनुमान गरिए पनि अनुसन्धान बिना केही भन्न सकिने अवस्थामा नरहेको उनले बताए। फोहर उठाइएको टोलबारे प्रहरी जानकार रहेको हुँदा अनुसन्धानबाट घटनाको सत्यतथ्य बाहिर आउने आशा पनि उनले व्यक्त गरे ।