प्रचण्डले वीरेन्द्रलाई भेट्न खोज्दा वंशनाश, मदन भण्डारीलाई भेट्न खोज्दा दासढुंगाकाण्ड
प्रकाशित मिति : आश्विन २९, २०७५ सोमबार
नेकपा अध्यक्ष पुष्पकमल दाहाल प्रचण्डले मदन भण्डारी र तत्कालिन राजा वीरेन्द्रलाई भेट्ने योजना अपूरो रहेको खुलासा गरेका छन् । पत्रकार शुभशंकर कँडेलबाट लिखित पुस्तक अवतरणमा प्रचण्डले यस्तो खुलासा गरेका हुन् ।
पुस्तकमा उल्लेख गरिए अनुशार विभिन्न चारघटक मिलेर नेकपा एकताकेन्द्र बन्दा पनि प्रचण्डलार्ई पार्टीको शक्ति सोचेजस्तो लागेनछ । त्योबेला अर्थात् २०४६ सालको जनआन्दोलन लगत्तैबाट वामपन्थी पार्टीहरुमध्ये सबैतिर मदन भण्डारीको चर्चाले शिखर चुमेको समय थियो । भण्डारीको भाषण र भाषण गरिरहेको आभा देख्दा यो मानिससँग पनि भेटेर कुरा गर्नुपर्छ भन्ने लागेछ ।
२०५० वैशाख अन्तिमसाता मदन भण्डारीसँग प्रचण्डले भेट्न चाहेको जानकारी मदन भण्डारीकहाँ पुग्यो । भण्डारीको कार्यव्यस्तता र उपत्यका बाहिरका कार्यक्रम भएकाले जेठ पहिलो हप्ता काठमाडौं बाहिरबाट भण्डारी फर्केपछि भेट्ने तय भएको थियो । तर दुर्भाग्यबस् उनीहरुले भेट्ने भनेको समयभन्दा पहिले नै विसं २०५० जेठ ३ गते पोखराबाट चितवनको कार्यक्रमका लागि जाँदै गर्दा चितवनको दासढुङ्गामा मोटर दुर्घटना गराएर मदनको हत्या भयो ।
मदनको हत्यापछि प्रचण्डको दिमागमा शान्तिपूर्ण बाटोबाट हिंड्न खोजे पनि आखिरी मदनकै हालत हुने भएपछि किन जनयुद्धको बाटो नजाने ? आखिर मर्नु त एकदिन छँदैछ । देश र जनताका लागि कुर्बानी नै गरेर मर्ने भन्नेमा उनको मन अरु बढी दरिएको पुस्तकमा उल्लेख छ ।
त्यस्तै प्रचण्डको दिमागमा एकपटक राजा वीरेन्द्रको माओवादी जनयुद्धका बारेमा के धारणा छ भन्ने बुझ्न मन लागेछ । त्यसपछि उनले दरबारिया दूतहरुसँग आफूले विश्वास गरेका मानिसहरुलार्ई सम्पर्क गर्न लगाए ।
जनयुद्ध फैलिंदै गएको थियो भने दमनका लागि २०५४ देखि हरेक सरकारले सेना परिचालनका लागि दरबारसँग हारगुहार गरिरहेका थिए । यो स्थितिबाट उम्कन प्रचण्डले एकातिर दलका नेताहरुसँग र तिनका निकटस्थहरुसँग सम्वाद सुरु गर्ने र अर्कातिर दरबारसँग पनि सम्पर्क अघि बढाउने रणनीति बनाएका थिए ।
तत्कालीन समयमा पनि भारत र चीनका लागि दरबारका दूत रमेशनाथ पाण्डेले माओवादी सुप्रिमो प्रचण्ड र बाबुराम भट्टराईलार्ई दिल्ली गएर लामो छलफल गरे । पाण्डेले राजा वीरेन्द्रलार्ई जानकारी गराएर मात्र होइन कि राजनीतिक म्याण्डेट समेत दिएर पठाएका थिए वीरेन्द्रले पाण्डेलार्ई ।
काठमाडौं वरिपरि जाने र केही क्यामोफ्लाईज गरेर वीरेन्द्रलाई भेट्ने तयारी भएको थियो । तर प्रचण्डले खबर पठाएको केही समयमा दरबार हत्याकाण्ड भयो । त्यतिबेला काठमाडौंको नागार्जुन वा चितवनको दियालो बंगलामा वीरेन्द्र र प्रचण्डको वार्ता गराउने तयारी भएको थियो ।
