भारतमा ३२ लाख डेबिट कार्ड ‘ह्याक’
प्रकाशित मिति : कार्तिक ७, २०७३ आईतबार
भारतीय विभिन्न बैंकबाट वितरण गरिएका करिब ३२ लाख डेबिट कार्ड ‘ह्याक’ भएको आशंकामा आफ्ना ग्राहकहरुलाई कार्डको व्यक्तिगत पिन नम्बर परिवर्तन गर्न सरकारी स्वामित्वमा सन्चालित स्टेड बैंक अफ इन्डियालगायतका बैंकहरुले आग्रह गरेका छन् ।
बैंक अधिकारीले हजारौं कार्डको पिन नम्बर परिवर्तन गर्न आग्रह गरेका छन् भने कैयौं अरु कार्डलाई ह्याक भएको आशंकामा ‘ब्लक’ गरिदिएको बताइएको छ । एटीएम नेटवर्कमा भाइरसको प्रभावका कारण समस्या आएको अधिकारीले बताएका छन् ।यसैबीच, भारतीय अर्थमन्त्री अरुण जेटलीले डेबिट कार्डमा कसरी यस्तो समस्या आयो ? भन्ने विषयमा छानबिन सुरु गरिएको बताएका छन् ।
भारतको नेसनल पेमेन्ट कर्पोरेसन (एनसीपीआई)ले ग्राहकबाट कार्डमा समस्या आएको बताएपछि बैंकबाट गरिने खुद्रा भुक्तानी प्रणालीलाई नियन्त्रण गरेको छ । संस्थाकाअनुसार ग्राहकले आफ्ना कार्डलाई चीन र अमेरिकामा अवैधरुपमा प्रयोग गरेको गुनासो ल्याएपछि एनसीपीआईले सम्पूर्ण बैंकलाई उक्त सूचना प्रवाह गरेको छ ।
एनसीपीआईका व्यवस्थापन निर्देशक तथा कार्यकारी प्रमुख अभयप्रसाद होटाले शुक्रबार ग्राहकलाई बैंकका अधिकारीले आवश्यक पूर्वसावधानी अपनाइसकेको जानकारी दिँदै समस्याको छिट्टै समाधान हुनेमा विश्वस्त तुल्याएका छन् ।भारतको सबैभन्दा ठूलो वित्तीय संस्था स्टेट बैंक अफ इन्डियाले भने देशभरबाट वितरण भएका करिब दुई करोड कार्डमध्ये ६ लाख २० हजार कार्ड असुरक्षित भएको हुनसक्ने बताएको छ ।
भारतका अर्थमामिला सचिव शक्तिकान्त दासले कसरी डेबिट कार्ड असुरक्षित बन्न पुगेको ? भन्ने विषयमा छानबिन सुरु गरिसकिएको बताए ।