अमेरिकामा सिमाबाट छिर्ने कागजपत्रविहिन रोक्न सेना परिचालनको तयारी
प्रकाशित मिति : चैत्र २१, २०७४ बुधबार
गैरकानुनी रुपमा सिमा क्षेत्रबाट आप्रवासीहरु प्रवेश गर्ने क्रममा नियन्त्रण गर्न अमेरिकी राष्ट्रपति डोनाल्ड ट्रम्पले सिमा क्षेत्रमा सेना परिचालन गर्ने प्रस्ताव अगाडि सारेका छन् । मुलुकको दक्षिणी सिमाबाट गैरकानुनी रुपमा आप्रवासीको प्रवेश रोक्न ट्रम्पले अमेरिका र मेक्सिकोको सिमाक्षेत्रमा अमेरिकी सेना परिचालनको प्रस्ताव अगाडि सारेका हुन् ।
अमेरिकी सेनाबाट अमेरिकी सिमाको सुरक्षा गर्न लागिएको र यो एउटा ठूलो कदम हुने ट्रम्पले बताएका छन् । मंगलबार ट्रम्पको भनाई आए लगत्तै डिपार्टमेन्ट अफ होमल्याण्ड सेक्युरिटीका एकजना बरिष्ठ अधिकारीले सिमानामा सेना परिचालन गर्ने विषय छलफलकै क्रममा रहेको बताएका छन् ।
मंगलबार अबेर ह्वाइट हाउसले जारी गरेको एउटा वक्तब्यमा ट्रम्पले बरिष्ठ अधिकारीहरुसँग सिमानामा सेना परिचालन गर्ने विषयमा छलफल गरेको उल्लेख छ ।
विगतमा सन् २००६ देखि सन् २००८ सम्म अपरेशन जम्प स्टार्टका नाममा तत्कालिन राष्ट्रपति जर्ज बुसले ६ हजार सेनालाई सिमा सुरक्षाका लागि खटाएका थिए । पछि उक्त मिसनका लागि देशभर २९ हजार सैन्य कर्मचारीहरु खटाइएको थियो । त्यस्तै सन् २०१२ मा ओबामाले सिमा सुरक्षा बलसँगको सहकार्यमा सेना खटाएका थिए ।