प्रचण्ड र केपी कमरेड, सानो मुख बढीबात नभन्नुहोला
प्रकाशित मिति : मंसिर २५, २०७४ सोमबार
चाहाने हो भने के संभव छैन र पक्कै पनि बिकास र समृद्धिको साथ देशलाई आमुल परिवर्तन गर्न सकिन्छ भनेर तपाईं हरुले जे बिकासका योजनाहरु तय गर्नुभएको छ तिनै योजनालाइ जनतासामु भनिरहंदा ती योजनाहरुले नेपाली जनतालाइ प्रभाब पारे। दुईछाक टार्न धौ–धौ पर्ने र बिदेशी भुमिमा पसिना बगाउनु पर्ने बाँध्यतामा रहेका नेपालीहरु खुसीले पुल्कित बने । तपाईंहरुका योजना ठाउँ ठाउँमा गएर सुन्न मात्र हैन टेलिभिजनका स्क्रिन हरुमा देखिरहंदा र तपाईहरुले सुनाइरहंदा सुनौलो नेपालको सपनामा सायद धेरै रात त नेपाली जनता निदाउन सकेनन् । केरुङ हुँदै काठमाडौं आउने रेलको यात्रा गरेर देश दौडाहा अभियनामा लाग्दा नेपाली जनताहरुले सुन्दर फुलवारीको मालिकनै सम्झे आफुलाइ ।
दुइछाक मीठो मसिनो परिवार संगै बसेर खाइवरी राप्तीको पुलवाट सिंगो जीवनको कल्पना गर्दा जनताले गरेको अनुभुति सायद तपाईहरु महसुस गर्न खै कति सक्नु हुन्छ ? स्वास्थ ,शिक्षा र ,सुशासनका सपनाले भोट दिने दिन सम्म पर्खिन पनि निकै उकुस मुकुस भैरहेको अवस्थामा मतदान केन्द्रमा पुग्दा दुखका दिन सकिएको अनुभुति गरे । मत ब्यक्त गर्न पाउँदा आफुलाइ दुनियाका सवै भन्दा भाग्यशाली नागरिक भएको महशुस गर्दै नेपाली जनताले आफुलाइ निकै बलियो ठाने। धेरै पटक मत दिएर पनि धोकाधडी भएको बिगतलाइ चटक्कै बिर्सेर अवका दिनहरु सुनौला हुनेमा आफुहरुलाई निकै भाग्यमानी ठाने। लामो समयको अस्थिर राजनीतिले दिक्दार भएर लगभग राजनीति प्रति चरम असन्तुष्टि रहेको समयमा पार्टी एकता गरेर देशको बिकासमा कटिवद्ध हुनेछौ भन्ने तपाईंहरुको सन्देशले जनताहरुमा एक प्रकारको रक्तसंचारनै भएजस्तो भयो । पुरा इमानदारी रुपमा जनताले आफ्नो जिम्मेवारी पुरा गर्न कुनै कसर बाकी राखेनन् । अबका दिनमा जनतासंग गरेका बाचा पुरा गर्ने समय तपाइँहरूको हो।
कमरेडहरु , भन्दा जस्तो सजिलो छैन काम गर्न तपाईं हरुनै विज्ञ हुनुहुन्छ यस बिषयमा । जनता प्रति गरेका बाचा पुरागर्न निकै गाह्रो छ । यही सामाजिक संरचनाभित्र बाट आएकाहरुलाईनै जनताले माला पहिराएर अगाडि ल्याएका छन् । यो एकताको सन्देश र तपाईहरुका बिकासका योजनाहरुको जीत हो। कार्यान्वयनको र त्यसपछिको जीतको लागि तपाईंहरुले फलामको च्युँरा चपाउनु पर्ने छ। नढाटी भन्दा आजका दिनमा पनि बिजयको माला पहिरिदै गर्दा धेरैले आजसम्मको राजनीतिमा लागेको ब्याजमात्र हैन चुनावी खर्च उठाउने सपना देखेका होलान । पाँचबर्षको लागि ढुक्क रहेको पद बाट अझ कसरी माथि पुग्ने ,घिनलाग्दो सोच बनाउदै कुन कोणंवाट तपाइँहरुसंग बार्गेनिङ गर्ने मनन् गर्दै होलान तर तपाइँहरु आफ्नो लक्षबाट पछाडि नहट्नु होला। जनताका सपनाहरु पुरा गर्न आफुले गरेका बचन वद्धतालाई शिरोपर गर्दै अवका पाँच बर्ष हैन बर्षौ बर्ष नेपाली जनताको लागि तपाईहरुको आबश्यकता रहेको महशुस गराउन प्रयत्न गर्नुहोला । जस्ले जिम्मेवारी लिएको हुन्छ जवाफ पनि उसैले दिनु पर्छ ।
यस अभियानका सारथीहरु धेरै होलान तर जनताले प्रचण्ड र ओलीलाई जान्दछन। धेरैको मनमा चिसो पनि छ आफ्नै पार्टी मिलाउन नसकेका ओली र प्रचण्डले कसरी सिंगो पार्टीलाई ब्यवस्थापन गरेर लान सक्लान भनेर । कमरेड हरु, अवको समय तपाईंहरु दुईजनाको लागि झनै संक्रमणकाल हो। यहाँ अनेक चलखेल गरेर तपाईहरुलाई कमजोर पार्न खोजिने छ । फुटाउ र राज गर भन्नेहरुको अगाडि सिगों पाटी ब्यवस्थापन गरेर देशको बिकास र सुशासनको लागि लड्न हिम्मत गर्ने तपाईहरुलाई भित्र, बाहिर,आफ्ना ,पराया सबैले कमजोर पार्न खोज्नेछन।
सवभन्दा पहिले आफ्ना संग बच्दै परायाको षड्यन्त्र बुझ्नु होला । यसको लागि तपाईहरु योजना बिकास र ब्यबस्थापन बाहेकका अन्य बिषयमा बढी नबोल्नु होला । किनकी संक्रमणमा जति बढी सवाल त्यति बढी जवाफ दिनुपर्नेछ । पक्कै पनि धेरै बोलेपछि कुरा बिग्रन समय पनि लाग्दैन। साँच्चै जनताले गरेको विश्वासलाई टुट्न नदिने हो भने अलमलनै नगरी पहिले पाटी एकिकरणलाइ ब्यबस्थापन गर्नुहोस। आजको समय र अवका दिनहरु बिकास र समृद्धिको लागिनै हुन भनेर जनताको माला पहिरिएकाहरुले पक्कै पनि तपाईहरुलाई अप्ठ्यारोमा पार्ने छैनन।जनताको पक्षमा बिकासका योजनाहरु फटाफट पास गर्दै जानुस जहाँ प्रत्यक्ष रुपमा जनता लाभान्वित हुने निर्णयलाई कसैले हुन्न भन्ने सक्ने छैनन् ।
दुई छिमेकी संगको संबन्ध सुमधुर राख्दै पहिले त आफ्नो घर बलियो ,सुन्दर र हरावरा बनाउने काम गर्नुहोस् । जनताका साना साना काम गर्दिएकै बहानामा तपाईं हरुका कार्याकर्ताले लिने दक्षिणा प्रवृत्तिको अन्त गर्नुहोस। पैसाको अगाडि इमान बेच्नतयार हुने राजनीति संस्कारको उन्मुलननै गर्नुहोस । साँच्चै मान्छेलाई न्युनतम आवश्यकताको अभाबले अड्किन नपरोस तर पैसा पाए पछि पद पनि किन्न सकिने गलत परिपाटीको अन्त गर्नुहोस। कस्तो जनशक्तिको खाँचो छ त देशलाई आफै निर्णय गर्न सक्ने निर्भीक बन्नुहोस।यो क्षण तपाईंहरुको संक्रमणकालको क्षण हो । जस्लाइ चिरेर नयाँ बिहानी ल्याउन तपाईहरु खुल्ला रुपमा उदाउन जरुरी छ ।