गोविन्द केसीले ‘बाजेको पेडा’ जस्तो नयाँशक्ति खोले हुन्छः ओली
प्रकाशित मिति : मंसिर २, २०७४ शनिबार
२ मंसिर, काठमाडौं । एमाले अध्यक्ष केपी ओलीले शुक्रबार साँझ अन्नपूर्ण होटलबाट राप्रपा अध्यक्ष कमल थापालाई मात्रै थर्काएनन्, डा. गोविन्द केसीलाई पनि ‘आफ्नो थान्कामा बस्न’ चेतावनी दिए ।
सरकारले राष्ट्रपतिमार्फत पारित गराएको चिकित्सा शिक्षा सम्बन्धी अध्यादेश अब आउने सरकारले खारेज गरिदिने एमाले अध्यक्ष ओलीले बताए ।
एउटा सरकारी कर्मचारीलाई अनसन बसाएर सरकारले उसँग वार्ता अनि सम्झौता गरेको र कर्मचारीले राष्ट्रपतिलाई लल्कारेको भन्दै ओलीले डा. गोविन्द केसीलाई आफ्नो थान्कोमा बस्न चेतावनी दिएका दिए ।
डा. केसीलाई राजनीति गर्न मन लागेको भए नयाँ शक्ति खोलेर राजनीतमा आए हुन्छ भन्दै ओलीले सरकारी कर्मचारी आफ्नो हैसियतमा बस्नुपर्ने आशय प्रकट गरे ।
ओलीले भने– ‘पोलिटिक्स गर्ने हो भने पोलिटिक्समा आए हुन्छ नि त । बरमझियाको बाजेको पेडाजस्तो नयाँ शक्ति, अझ नयाँ शक्ति, झन नयाँ शक्ति खोले हुन्छ ।’
एउटा सरकारी कर्मचारीले औंलो ठड्याएको फोटो खिचेर एमालेलाई चेतावनी दिन नसुहाउने ओलीले बताए ।
डा. गोविन्द केसी र स्वास्थ्यसम्बन्धी अध्यादेशबारे केपी ओलीले अन्नपूर्ण होटलबाट के–के भने ? पढौं अाेलीकै शब्दमाः
कति वर्षपछि मेडिकल कलेज खोल्न पाइन्छ कि पाइँदैन भन्ने कुरा १५ दिने सरकारले भन्ने होइन । कहाँ दार्चुलामा खोल्ने कि, सोलुखुम्बुमा खोल्ने कि, माथि किमाथांकातिर मेडिकल कलेज खोल्ने कि, काठमाडौंतिर खोल्ने कि, दुई/चार जना मान्छे भएका ठाउँमा खोल्ने कि, दुईचार लाख भएका ठाउँमा खोल्ने ? यो कुरा कि त सरकारले जान्दछ, कि त लगानीकर्ताले जान्दछ ।
यस्ता कुराहरुमा अहिले एउटा कर्मचारी अनसन बस्छ, अनि सरकारले कर्मचारीसँग वार्ता गर्छ, सम्वाद गर्छ । धुमधामसँग कर्मचारीसँग सम्झौता गर्छ सरकारले ! र, आफ्ना अनुकुलका निर्णयहरु केही भएन भने अध्यादेशमार्फत गराउँछ ।
अनि कर्मचारीले राष्ट्रपतिलाई लल्कार्छ । सरकारी कामकाजमा बाधा पुर्याउँछ । बेमतलवसँग एमालेको भनाइमा, एमालेको दबावमा भयो भन्छ । अहिले यसो भनेर के हुन्छ ? भोलि एमालेले बदर गर्दिन सकिहाल्छ नि । राष्ट्रपतिकहाँ गएर यसो गर्दिनोस्, यसो नगर्दिनोस् भनिराख्न के जरुरी छ एमालेलाई ? एमाले यस्ता कच्चा खेलहरु खेल्दैन ।
पोलिटिक्स गर्ने हो भने पोलिटिक्समा आए हुन्छ नि त । नयाँशक्ति भनेको छ, अर्को केके भनेको छ, अझ अर्को नयाँशक्ति ! बरमझियाको बाजेको पेडाजस्तो नयाँ शक्ति, अझ नयाँ शक्ति, झन नयाँ शक्ति खोले हुन्छ ।
एमाले चुप लागेर बसेको छ । सरकारले अध्यादेश बनायो रे । हामीलाई सोधिएको छैन । भनेको पनि छैन । हामीले थाहा पनि पाएको छैन । राष्ट्रपतिकहाँ अध्यादेश गयो अरे । त्यो पनि थाहा छैन ।
एउटा कर्मचारीले औंलो ठड्याएको फोटो खिचेर अनि एमालेलाई यस्तो उस्तो चेतानवी दिन्छौं भन्ने ? एमाले कर्मचारी नदेखिकन यहाँ आइपुगेको छ कि क्या हो ?
म केमात्रै भन्न चाहान्छु भने रुल अफ ल हुनुपर्छ देशमा । लजिकल हुनुपर्छ कुरा । कानूनसम्मत हुनुपर्छ । जोरजुलुम, जबरजस्ती, यस्तो उस्तो, यसरी देश चल्दैन । रुल अफ ल हुनुपर्छ । सरकारले रुल बनाउनुपर्छ, ल बनाउनुपर्छ । संविधानबमोजिम कानून, कानून वमोजिम नियम र नियम बमोजिम विनियम गरेर चलाउनुपर्छ ।
तर, एउटा कर्मचारीलाई अनसन बसाएर त्यहाँबाट अनेक तमासा गर्याे, अनि पोलिटिकल पार्टीलाई डिफेम गर्याे । अहिले के मतलव थियो यो हमला ? न अध्यादेश लेख्ने एमाले हो, न अध्यादेश स्वीकृत गर्ने एमाले हो, न नगर भन्ने नै एमाले हो । एमाले आफ्नो ठाउँमा छ । हामीसँग परामर्श केही गरिएको छैन, गाली गरेकोमात्रै सुनिराखेका छौं हामीले । अचम्म लाग्छ बा ! यो कस्तो पोलिटिक्स हो ?
एमालेलाई डिफेम गराउन, एमालेविरुद्ध वातावरण बनाउन अनेक आरोपहरु लगाउने ? हामी भनिराखेका छौं, स्वास्थ्य विमा हामीले गरेका हौं । डायलाइसिस फ्री हामीले गरेका हौं ।
यत्रो नेपाली विद्यार्थीहरु विदेशमा गएका छन् । प्राविधिक शिक्षाका नाममा नेपालीहरुको पैसा यति धेरै बाहिर गएको छ । यसकुरालाई कसरी रोक्ने ? यसमा छलफल गर्न सकिन्छ । तर, छलफल गर्ने होइन, सुझाव दिने होइन, अनि एमालेका विरुद्ध पाखुरा सुर्किएर कसको इन्ट्रेस्टका लागि काम भइराखेको छ ?
सरकारी जागिर खाने कर्मचारीहरु आफ्नो थान्कामा बसुन् । ठीक छ, पोलिटिक्स गर्ने हो भने मैदानमा आए हुन्छ । मैले यतिमात्रै भनौं ।