ट्रम्प प्रशासनलाई नयाँ चुनौती: महँगी र ब्याजदर वृद्धिका कारण मध्यावधि निर्वाचन प्रभावित हुने संकेत
प्रकाशित मिति : २० आश्विन २०८३, मंगलबार
Photo: Martin Zenker/Unsplash
बढ्दो घरजग्गा कर्जाको ब्याजदरले नयाँ घरखरिदकर्ताहरूलाई बजारमा प्रवेश गर्न कठिन बनाइदिएको छ। यसले अमेरिकाका राष्ट्रपति डोनाल्ड ट्रम्प र उनको रिपब्लिकन पार्टीका लागि आगामी मध्यावधि निर्वाचन अघि थप आर्थिक चुनौती खडा गरेको छ।
फ्रेडी म्याकको तथ्याङ्कअनुसार गत साता ३० वर्षे निश्चित घर कर्जाको औसत ब्याजदर ७.२८ प्रतिशत पुगेको छ, जुन सन् २०२३ नोभेम्बर यताकै उच्च हो। यो दर अघिल्लो साताको तुलनामा ०.२५ प्रतिशतले बढेको हो, जुन विगत चार वर्षभन्दा बढी समययताकै ठूलो सातागत वृद्धि हो।
इरान युद्धका कारण इन्धनको मूल्य उच्च रहनु र मुद्रास्फीति ३ प्रतिशतभन्दा माथि नै रहनुका बीच घर कर्जाको बढ्दो ब्याजदर ट्रम्प र रिपब्लिकनहरूका लागि टाउको दुखाइको विषय बनेको छ।
रिपब्लिकन रणनीतिकार म्याट गोर्मनका अनुसार, अर्थतन्त्र र जीवनयापनको लागत जस्ता विषयहरू सन् २०२६ को निर्वाचनमा मतदाताहरूका लागि पक्कै पनि निर्णायक बन्नेछन्, जुन विगत दुई वर्षदेखि मुख्य मुद्दा बन्दै आएका छन्।”
विशेषज्ञहरूका अनुसार घर कर्जाको ब्याजदर ७ प्रतिशतभन्दा माथि पुग्नुमा विभिन्न कारणहरू छन्। नेसनल एशोसिएसन अफ रियल्टर्सका मुख्य अर्थशास्त्री लरेन्स युनका अनुसार इरान द्वन्द्वका कारण बढेको ऊर्जाको मूल्यले महङ्गी बढाउन मद्दत पुर्याएको हो।
ब्यूरो अफ इकनोमिक एनालाइसिसको तथ्याङ्कअनुसार व्यक्तिगत उपभोग खर्च मूल्य सूचकाङ्कका आधारमा मापन गरिएको वार्षिक मुद्रास्फीति गत फेब्रुअरीमा २.८ प्रतिशत रहेकोमा अगस्टसम्म आइपुग्दा बढेर ३.४ प्रतिशत पुगेको छ।