अमेरिकामा गोदामलाई हिरासत बनाउँदै आइस: १ अर्ब डलर खर्च, ९२ हजार बेड थप्ने तयारी
प्रकाशित मिति : ६ चैत्र २०८२, शुक्रबार
फोटो: होमल्याण्ड सेक्युरिटी
अमेरिकी अध्यागमन तथा भन्सार प्रवर्तनले देशभरका व्यावसायिक गोदामहरू खरिद गरी तिनलाई हिरासत केन्द्रमा परिणत गर्ने कार्यलाई तीव्रता दिएको छ। आन्तरिक दस्तावेजहरूका अनुसार एजेन्सीले २४ वटा ठूला गोदामहरूलाई मर्मत सम्भार गरी हिरासतको क्षमता ९२,००० बेड पुर्याउने लक्ष्य राखेको छ। यस अन्तर्गत ७,००० देखि १०,००० जनासम्म अट्ने ‘मेगा सेन्टर’ हरू निर्माण गरिनेछ, जहाँबाट डिपोर्टेशनको प्रक्रिया अघि बढाइनेछ।
मार्च १७ सम्ममा सरकारले देशभर कम्तीमा ११ वटा गोदाम खरिद गरिसकेको छ। यद्यपि, केही स्थानमा स्थानीय बासिन्दा र राजनीतिज्ञहरूको चर्को विरोधपछि निजी विकासकर्ता र सरकार पछि हट्नुपरेको छ। जर्जिया र टेक्सस जस्ता राज्यमा किनिएका कतिपय गोदामहरू फुटबल मैदानभन्दा १७ गुणा ठूला छन्। यति ठूला भवनमा मानिसहरूलाई राख्दा ढल, खानेपानी र अन्य पूर्वाधारमा समस्या पर्ने भन्दै स्थानीय अधिकारीहरूले चिन्ता व्यक्त गरेका छन्।
राष्ट्रपति डोनाल्ड ट्रम्पले होमल्याण्ड सेक्युरिटीको नेतृत्वका लागि रोजेका सिनेटर मार्कवेन मुलिनले पनि यो योजनाप्रति केही आशंका व्यक्त गरेका छन्। उनले ठूला सुविधाहरूले स्थानीय पूर्वाधारमा भार पार्ने र संघीय सम्पत्ति भएकाले स्थानीय कर राजस्वमा समेत असर पुर्याउने बताएका छन्। हालसम्मले यी गोदामहरू खरिद गर्न १ अर्ब डलरभन्दा बढी खर्च गरिसकेको छ, जुन बजार मूल्यभन्दा ११ देखि ३० प्रतिशतसम्म बढी रहेको पाइएको छ।