ट्रम्पले हटाएकी फेडरल रिजर्भकी गभर्नर कुकद्वारा अदालतमा मुद्दा दायर गर्ने तयारी
प्रकाशित मिति : भाद्र ९, २०८२ मंगलबार
अमेरिकी राष्ट्रपति डोनाल्ड ट्रम्पले फेडरल रिजर्भ बैङ्ककी गभर्नर लिसा कुकलाई पदबाट हटाएपछि उनले अदालतमा मुद्दा दायर गर्ने तयारी गरेकी छन्।
ट्रम्पको निर्णयविरुद्ध कुकले अदालतमा मुद्दा दायर गर्ने भएकी हुन्, उनका वकिलहरूले बताएका छन्। यसले राष्ट्रपति र अमेरिकी केन्द्रीय बैंकबीच टकराव चर्कन सक्ने आकलन गरिएको छ।
कुककी वकिल एबे डेभिड लोवेलले एक विज्ञप्तिमा भनिन्, “राष्ट्रपति ट्रम्पलाई गभर्नर लिसा कुकलाई हटाउने कुनै अधिकार छैन।”
ट्रम्पले कुकले मोर्गेज सम्बन्धमा गलत बयान दिएको विश्वास गर्न पर्याप्त कारण रहेको दाबी गर्दै उनलाई हटाउन संवैधानिक अधिकार प्रयोग गरेको बताएका छन्। यो कदम ट्रम्पले फेडमाथि, विशेषगरी यसका अध्यक्ष जेरोम पावेलमाथि, ब्याजदर घटाउन आनाकानी गरेको भन्दै बढ्दो दबाब दिइरहेको समयमा आएको हो।
कुक फेडको सात सदस्यीय बोर्ड अफ गभर्नर्समध्ये एक हुन्। यस पदमा बसेर उनी १२ सदस्यीय समितिमा सहभागी हुन्छिन्। यो समितिले अमेरिकाको ब्याजदर तोक्ने जिम्मेवारी लिन्छ। उनी यस भूमिकामा बस्ने पहिलो अफ्रिकी–अमेरिकी महिला हुन्।
ट्रम्पको कदमले लगानीकर्तामाझ फेडको विश्वसनीयतामा आघात पुग्ने डर बढाएको छ। मंगलबार दीर्घकालीन अमेरिकी सरकारी कागजपत्र (बन्ड) को शेयर कारोबारमा लगानीकर्ताले बढी जोखिम देखिरहेका संकेत देखिएको थियो। यदि लगानीकर्ताले फेडमाथि शङ्का गर्न थाले भने अमेरिकी सरकारलाई ऋण लिन महँगो पर्न सक्छ, जसको प्रभाव विश्वभर पर्न सक्छ।
कुकका वकिलले भने, “केवल एउटा सिफारिसपत्रमा आधारित भएर उनलाई हटाउने प्रयास गर्नु कानुनी र तथ्यगत आधारबिनाको हो। हामी यस गैरकानुनी कदमविरुद्ध मुद्दा दायर गर्नेछौँ।”
कुकले राष्ट्रपतिले जुन कारण देखाएर हटाएको दाबी गरेका छन्, त्यस्तो कुनै कानुनी कारण नरहेको बताएकी छिन्। उनले राजीनामा नदिने र २०२२ देखि जस्तै अमेरिकी अर्थतन्त्रलाई सहयोग गर्ने आफ्नो काम निरन्तर गर्ने बताएकी छिन्।
ट्रम्पले कुकलाई राजीनामा दिन माग गर्दै मोर्गेजमा धोकाधडी गरेको आरोप लगाएका थिए। यो आरोप ट्रम्पका सहयोगी र आवास नियामक बिल पुट्लेले अटर्नी जनरल पाम बोंडीलाई पठाएको सार्वजनिक पत्रमार्फत सुरु भएको हो। उनले यसलाई “आपराधिक सिफारिस” भन्दै न्याय मन्त्रालयलाई छानबिन गर्न आग्रह गरेका थिए।