अमेरिकी झण्डा जलाउनेहरूविरुद्ध आपराधिक अभियोग लगाउन राष्ट्रपति ट्रम्पको आदेश
प्रकाशित मिति : भाद्र ८, २०८२ सोमबार
अमेरिकी राष्ट्रपति डोनाल्ड ट्रम्पले अमेरिकी झण्डा जलाउनेलाई आपराधिक अभियोग लगाउन आदेश दिएका छन्।
राष्ट्रपति ट्रम्पले कार्यकारी आदेशमा हस्ताक्षर गर्दै प्रदर्शनका क्रममा अमेरिकी झण्डा जलाउने व्यक्तिहरूलाई आपराधिक अभियोग चलाउन संघीय अभियोजकहरूलाई निर्देशन दिएका हुन्।
आदेशअनुसार अमेरिकी अटर्नी जनरल प्याम बोन्डीलाई झण्डा जलाउने घटनाहरूमा छानबिन गर्न निर्देश गरिएको छ।
शान्ति भङ्ग वा वातावरणीय कानुन तोड्नेजस्ता अन्य अपराधका आधारमा पनि अभियोग चलाउन सकिने अटर्नी जनरल बोन्डीलाई हेर्न भनिएको छ।
आदेशमा **जेल सजायबारे स्पष्ट प्रावधान नभए पनि ट्रम्पले हस्ताक्षर गर्ने क्रममा भने, “तिमीले झण्डा जलायौ भने, एक वर्ष जेल जानेछौ”।”
यो कदमले सन् १९८९ मा अमेरिकी सर्वोच्च अदालतले दिएको ऐतिहासिक फैसलालाई बेवास्ता गर्ने प्रयास हो।
टेक्सस र जोन्सनमा अदालतले ५-४ को निर्णय गर्दै झण्डा जलाउने कार्यलाई पहिलो संशोधनअन्तर्गत संरक्षित राजनीतिक अभिव्यक्ति भएको ठहर गरेको थियो।
त्यस फैसलाले ४८ राज्यका झण्डा जलाउनेविरुद्धका कानुनलाई अमान्य गरिदिएको थियो। अमेरिकी समाजमा झण्डा जलाउने कार्य प्रायः राजनीतिक विरोध वा असन्तुष्टि प्रदर्शन गर्ने प्रतीकका रूपमा प्रयोग हुन्छ।
सन् १९६० को दशकमा भियतनाम युद्धविरुद्धका प्रदर्शनहरूमा झण्डा जलाउने घटना निकै चर्चित भएको थियो। धेरै अमेरिकी नागरिकहरू झण्डालाई राष्ट्रिय गर्व, स्वतन्त्रता र बलिदानको प्रतीक मान्छन्। त्यसैले झण्डा जलाउने कामलाई उनीहरूले गम्भीर अपमान ठान्छन्।
अर्कोतर्फ, कतिपय नागरिक र कार्यकर्ताले यसलाई लोकतान्त्रिक अधिकार र स्वतन्त्रताको शक्तिशाली अभिव्यक्तिका रूपमा लिन्छन्। अमेरिकामा हरेक पटक झण्डा जलाउने विषय उठ्दा देशभक्तिपूर्ण भावनाबारे बहस चर्किन्छ।
“अमेरिकी झण्डा जलाउने” कार्य विरोध प्रदर्शनको एउटा अत्यन्त विवादास्पद तर संवैधानिक रूपमा संरक्षित राजनीतिक अभिव्यक्ति हो।
यसले राष्ट्रप्रतिको गहिरो भावनालाई ठेस पुर्याउँछ तर लोकतन्त्र र स्वतन्त्रताको अधिकारलाई पनि उजागर गर्छ।