बाल्टिमोरमा नेशनल गार्ड पठाउने राष्ट्रपति ट्रम्पको चेतावनी
प्रकाशित मिति : भाद्र ७, २०८२ आईतबार
अमेरिकी राष्ट्रपति डोनाल्ड ट्रम्पले बाल्टिमोरमा नेशनल गार्ड पठाउने चेतावनी दिएका छन्।
यो कदमले मेरिल्यान्डका गभर्नर वेस मूरसँग उनको टकरावलाई थप चर्काएको छ। डेमोक्र्याट मूरले ट्रम्पलाई सहरमा हुने सुरक्षा स्थिति अवलोकन गर्न आमन्त्रित गरेका थिए।
ट्रम्पले सामाजिक सञ्जालमा लेखेका छन्, “यदि वेस मूरलाई एलएका ग्याभिन न्युसमलाई जस्तै मद्दत चाहिन्छ भने, म ‘ट्रुप्स’ पठाउनेछु। यस्तै स्थिति नजिकै डीसीमा पनि छ, र म चाँडै नै अपराधलाई निर्मूल गर्नेछु।”
ट्रम्पको यो भनाइ डेमोक्र्याटिक नेताहरूले चलाएका सहरहरूमा अपराध नियन्त्रण गर्ने नाममा नेशनल गार्ड पठाउने उनको रणनीतिको पछिल्लो उदाहरण बनेको छ।
नेशनल गार्डलाई आन्तरिक कानुन कार्यान्वयनमा प्रयोग गर्ने कदमप्रति डेमोक्र्याटहरूले कडा विरोध जनाएका छन्। आगामी केही हप्तामा १९ वटा राज्यमा करिब १,७०० नेशनल गार्ड परिचालन हुने सम्भावना छ।
गभर्नर मूर राष्ट्रपति ट्रम्पका कडा आलोचक हुन्। उनले भने, “अपराधबारे ट्रम्पका टिप्पणीहरू निकै अज्ञानी र असंवेदनशील देखिन्छन्।”
“उनीहरू हाम्रो सडकमा हिँडेका छैनन्, समुदायमा आएका छैनन्, तर हामीबारे बारम्बार गलत धारणाहरू फैलाइरहेका छन्,” ट्रम्पप्रति लक्षित गर्दै मूरले थपे।
आइतबार ट्रुथ सोसलमा ट्रम्पले लेखेका टिप्पणीहरू मूरको निमन्त्रणा पत्रप्रति प्रत्यक्ष प्रतिक्रियाजस्तै देखिएका थिए। ट्रम्पले त्यो पत्रलाई “अपमानजनक” र “उत्तेजनापूर्ण” भनेका छन्।
ट्रम्पले भने, “राष्ट्रपति भएको नाताले, म चाहन्छु कि उनी पहिले यो अपराधको संकट समाधान गरून्, त्यसपछि मात्र म त्यहाँ अवलोकन गर्न जाउँला।”
ट्रम्पले हालसम्म वाशिङटन डीसीमा करिब २,००० नेशनल गार्ड पठाइसकेका छन् । ह्वाइट हाउसका अनुसार अभियान सुरु भएदेखि सयौँ व्यक्ति पक्राउ परेका छन्।
ह्वाइट हाउसमा बोल्दै ट्रम्पले डीसी नरकजस्तो थियो, तर अहिले सुरक्षित छ भनेर दाबी गरेका थिए। ट्रम्पले न्युयोर्क र शिकागोमा पनि नेशनल गार्ड पठाउने संकेत दिएका छन्।