ट्रम्प प्रशासनको निशानामा अब जर्ज वाशिङटन विश्वविद्यालय,२२ अगस्टसम्म सहमति रोज्न चेतावनी
प्रकाशित मिति : श्रावण २७, २०८२ मंगलबार
ट्रम्प प्रशासनले जर्ज वाशिङटन विश्वविद्यालयलाई लक्षित गरेको छ । विश्वविद्यालयले यहूदी, अमेरिकी इजरायली र इजरायली विद्यार्थी तथा शिक्षकहरूका लागि शत्रुतापूर्ण वातावरण सिर्जना गरेको भन्दै संघीय नागरिक अधिकार ऐनको उल्लङ्घन गरेको आरोप लगाइएको छ ।
अमेरिकी न्याय मन्त्रालयले जारी गरेको विज्ञप्तिमा २०२४ को अप्रिल र मे महिनामा भएका प्यालेस्टाइन समर्थक प्रदर्शनका क्रममा विश्वविद्यालयले “यहूदी, अमेरिकी इजरायली र इजरायली विद्यार्थी तथा शिक्षकहरूप्रति जानाजानी उदासीनता देखाएको” उल्लेख छ ।
सहायक अटर्नी जनरल हरमित ढिल्लनले विश्वविद्यालयका अध्यक्ष एलेन ग्रानबर्गलाई पठाएको पत्रमा केही विद्यार्थीले “यहूदी विरोधी र विघटनकारी प्रदर्शन” गरेको बताएका छन् ।
यी गतिविधि यहूदी, इजरायली र अमेरिकी इजरायली विद्यार्थीलाई डराउने, धम्क्याउने र विश्वविद्यालयको वातावरणमा पहुँच नदिने उद्देश्यले गरिएको मन्त्रालयको दाबी छ ।
मन्त्रालयले यस विषयमा कानुनी कारबाही गर्ने इच्छा राखे पनि विश्वविद्यालयलाई २२ अगस्टसम्ममा समाधानका लागि छलफल गर्न तयार छ कि छैन भनी जानकारी दिन अल्टिमेटम दिएको छ ।
जर्ज वाशिङटन विश्वविद्यालय, ट्रम्प प्रशासनको निशानामा परेको पछिल्लो शिक्षण संस्था हो । प्रशासनले अमेरिकाको सहयोगी राष्ट्र इजरायलको गाजामा भइरहेको युद्धविरुद्धका प्यालेस्टाइन समर्थक प्रदर्शनका कारण विश्वविद्यालयहरूको संघीय बजेट कटौती गर्ने चेतावनी दिएको छ ।