अमेरिकामा टेस्लालाई २४३ मिलियन डलर जरिवाना, कारण यस्तो रहेछ
प्रकाशित मिति : श्रावण १७, २०८२ शनिबार
अमेरिकामा २०१९ मा भएको दुर्घटनामा टेस्ला आंशिक रूपले दोषी ठहर भएको छ । उक्त दुर्घटनामा ‘सेल्फ ड्राइभिङ’ सफ्टवेयर चलाइएको टेस्ला मोडल एस गाडीले एक पैदल यात्रुलाई किचेर मारेको थियो ।
सो घटनामा अर्का एकजना गम्भीर घाइते भएका थिए । फ्लोरिडाको एक जूरीले यो घटनामा टेस्लालाई आंशिक रूपले दोषी ठहर गरेको हो ।
पीडित पक्षले ‘अटोपायलट’ नामक सहयोगी सफ्टवेयरले चालकलाई दुर्घटनाको चेतावनी दिनुपर्ने र ब्रेक लगाउनु पर्ने दाबी गरेका थिए ।
तर टेस्लाले चालक जर्ज म्यागीलाई दोषी बताउँदै निर्णयलाई “गलत” भनेको छ र उनले दिएको बयानमा अपील गर्ने जनाएको छ । निर्णय अनुसार टेस्लाले अधिकतम २४३ मिलियन डलर जरिवाना र क्षतिपूर्ति तिर्नुपर्नेछ ।
यो फैसला टेस्ला र सीईओ एलन मस्कका लागि ठूलो झट्का मानिएको छ । जसले आत्मनिर्भर प्रविधिलाई कम्पनीको भविष्यका रूपमा प्रचार गरेका छन् । यो समाचार सार्वजनिक भएपछि टेस्लाको सेयर मूल्य झण्डै २ प्रतिशत ले घटेको छ ।
पीडित पक्षका वकिलहरूका अनुसार मस्कले अटोपायलट ड्राइभर सहायता सफ्टवेयरको क्षमता झुटो तरिकाले प्रचार गरेका थिए ।
वकिल ब्रेट श्राइबरले भने, “टेस्लाले अटोपायलटलाई सीमित राजमार्गका लागि डिजाइन गरेको थियो । तर त्यसलाई अन्य स्थानहरूमा पनि प्रयोग गर्न दिइयो । साथै एलन मस्कले अटोपायलट मान्छेभन्दा राम्रो चलाउने बताए”।
यो मुद्दा नाइबेल बेनाभिडेस लियोन नामकी २२ वर्षीया महिलाको परिवारले दायर गरेका थिए । जसलाई फ्लोरिडा कीजको एउटा टी इन्टरसेक्सनमा टेस्ला गाडीले किचेको थियो । उनको प्रेमी डिलन अंगुलो गम्भीर घाइते भएका थिए । उनी पनि मुद्दामा सहभागी थिए ।
तीन सातासम्म चलेको सुनुवाइपछि जूरीले कुल ३२९ मिलियन डलर जरिवाना तोकेको छ । जसमा १२९ मिलियन डलर क्षतिपूर्ति र २०० मिलियन डलर दण्डात्मक जरिवाना सामेल छन् ।
यो मुद्दा अटोपायलटसँग सम्बन्धित संघीय स्तरको पहिलो जूरी मुद्दा थियो । यसअघि २०१८ मा एप्पलका इन्जिनियरको ज्यान गएको दुर्घटनासम्बन्धी मुद्दा टेस्लाले मिलेमतोमा टुंग्याएको थियो ।
पछिल्लो वर्ष, क्यालिफोर्नियाको एउटा राज्य जूरीले भने टेस्ला निर्दोष रहेको ठहर गरेको थियो ।
टेस्लाले अटोपायलट र आत्मनिर्भर प्रविधिमा लामो समयदेखि आलोचना खेप्दै आएको छ । टेस्ला राजनीतिक गतिविधिका कारण कमजोर बिक्रीबाट जुधिरहेको बेला जूरीको यो फैसला आएको छ ।