अमेरिकी-जर्मन नागरिकलाई इजरायलबाट अमेरिका डिपोर्ट
प्रकाशित मिति : जेष्ठ १२, २०८२ सोमबार
Photo: Global Residence Index
अमेरिकी दूतावास जलाउने प्रयास गरेको आरोपमा अमेरिकी-जर्मन नागरिक जोसेफ न्युमेयरलाई इजरायलबाट अमेरिका फर्काइएको छ।
इजरायलको तेल अभिभस्थित अमेरिकी दूतावासमा आगो लगाउने प्रयास गरेको आरोपमा उनलाई अमेरिका डिपोर्ट गरिएको अमेरिकी अधिकारीहरूले बताएका छन्।
२८ वर्षीय जोसेफ न्युमेयरलाई इजरायलमा पहिलो पटक पक्राउ गर्दा उनको झोलामा विस्फोटक सामग्री फेला परेको थियो।
उनलाई अमेरिका पठाइएलगत्तै न्यूयोर्कको जोन एफ केनेडी विमानस्थलमा अमेरिकी अधिकारीहरूले नियन्त्रणमा लिएका थिए। अमेरिकी न्याय मन्त्रालयले जनाएअनुसार, उनलाई अदालतमा पेस गरी जेलमा राखिएको छ।
अमेरिकाकी अटर्नी जनरल प्याम बन्डीले भनिन्, “यस अभियुक्तमाथि इजरायलमा रहेको दूतावासलाई लक्षित गरी भयावह आक्रमणको योजना बनाएको, अमेरिकीहरूलाई मार्ने धम्की दिएको र राष्ट्रपति ट्रम्पको ज्यान लिने धम्की दिएको अभियोग लगाइएको छ।”
दूतावासअगाडि झोला छाडेर भागे
अमेरिकी अधिकारीहरूका अनुसार, न्युमेयर अप्रिलमा इजरायल पुगेका थिए। मे १९ मा उनी कालो रङ्गको झोला बोकेर तेल अभिभस्थित अमेरिकी दूतावासतर्फ गएका थिए। उनले दूतावासका सुरक्षा गार्डलाई थुकेका थिए। गार्डले उनलाई समात्न खोज्दा उनी भागेका थिए र आफ्नो झोला त्यहीँ छाडेका थिए।
सो झोलामा तीनवटा मोलोटोभ ककटेल फेला परेको बताइएको छ। यस्ता हतियारमा ज्वलनशील पदार्थ भरिएको हुन्छ, जसलाई आगो लगाएर फ्याँक्दा आगलागी गराउँछ।
होटलबाट पक्राउ, सामाजिक सञ्जालमा धम्की
इजरायली प्रहरीले उनलाई केही समयपछि उनको होटलबाट पक्राउ गरेको थियो। न्युमेयरले सामाजिक सञ्जालमा “तेल अभिभस्थित दूतावास जलाउने” घोषणा गरेका थिए। उनले “अमेरिकालाई मर्न देऊ, अमेरिकीहरू मर्नुपर्छ” भन्ने जस्ता धम्कीपूर्ण सन्देशहरू पनि पोस्ट गरेका थिए।
अधिकारीहरूका अनुसार, उनले राष्ट्रपति डोनाल्ड ट्रम्पको हत्या गर्ने धम्कीसमेत दिएका थिए। यदि दोषी ठहरिएमा उनलाई २० वर्षसम्म जेल सजाय हुन सक्छ।
वासिङ्टन डीसीमा इजरायली दूतावासका कर्मचारीको हत्या
न्युमेयरको निर्वासनको समाचार केही दिनअघि मात्र वासिङ्टन डीसीमा इजरायली दूतावासका दुई कर्मचारीको गोली हानी हत्या गरिएको घटनापछि सार्वजनिक भएको हो।
गत बुधबार राजधानीको यहूदी सङ्ग्रहालय नजिकै भएको एक कार्यक्रममा यारोन लिस्चिन्स्की र साराह लिन मिलग्रिम नाम गरेका दम्पतीको गोली हानी हत्या गरिएको थियो।
पुलिसले गोली चलाउने व्यक्तिको पहिचान ३० वर्षीय इलियास रोड्रिगेजको रूपमा गरेका छन्, जसले गोली चलाएपछि “फ्री प्यालेस्टाइन” भन्दै नाराबाजी गरेका थिए।