युक्रेनमा रहेको दुतावासमा रुसले हमला गर्नसक्ने अमेरिकाको चेतावनी , कर्मचारीलाई सुरक्षित ठाउँमा आश्रय लिन निर्देशन
प्रकाशित मिति : मंसिर ५, २०८१ बुधबार
युक्रेनको राजधानी किएभस्थित अमेरिकी दूतावासले रुसले हवाई आक्रमण गर्न सक्ने भन्दै चेतावनी दिएको छ ।
दूतावासले नोभेम्बर २० मा हवाई आक्रमणको विशेष सूचना प्राप्त गरेको उल्लेख गर्दै सावधानीका साथ दूतावास बन्द गर्ने र कर्मचारीलाई सुरक्षित ठाउँमा आश्रय लिन निर्देशन दिएको वेबसाइटमार्फत बताएको छ ।
दूतावासले अमेरिकी नागरिकहरूलाई हवाई सतर्कता घोषणा भएको खण्डमा तत्काल आश्रय लिन तयार रहन सिफारिस गर्दछ दूतवासले भनेको छ ।
युक्रेनले करिब तीन वर्षको युद्धमा पहिलो पटक लामो दूरीको अमेरिकी क्षेप्यास्त्र आफ्नो क्षेत्रमा प्रयोग गरेपछि रुसले मङ्गलबार यसको जवाफ दिने चेतावनी दिएको थियो ।
रुसी विदेशमन्त्री सर्गेई लाभरोभले आक्रमणले पश्चिमी देशहरूले द्वन्द्व ‘तीव्र’ पार्न चाहेको देखाएको बताउनुभयो ।
अमेरिकाले यस हप्ता युक्रेनलाई रुसभित्रका सैन्य लक्ष्यहरूमा एटिएसिएमएस प्रयोग गर्न स्वीकृति दिएको पुष्टि गरेको छ ।