बाइडेन र ट्रम्पको भेट, सत्ताको सहज हस्तान्तरण हुने बाइडेनद्धारा स्पष्ट
प्रकाशित मिति : कार्तिक २८, २०८१ बुधबार
President Joe Biden meets with President-elect Donald Trump in the Oval Office of the White House, Wednesday, Nov. 13, 2024, in Washington. (AP Photo/Evan Vucci)
अमेरिकी राष्ट्रपति जो बाइडेन र नवनिर्वाचित राष्ट्रपति डोनाल्ड ट्रम्पबिचमा ह्वाइट हाउसमा भेटवार्ता भएको छ ।
बाइडेनले सरकारको हस्तान्तरणको संकेतका रूपमा लामो समयदेखि चलिआएको परम्पराअनुसार ट्रम्पलाई भेट्न आमन्त्रित गर्नुभएको अपेक्षा गरिएको छ ।
जुनको अन्त्यतिर भएको राष्ट्रपतिको बहसपछि पहिलो पटक यी दुई नेताहरूबीच भेट भएको हो । त्यसपछि बाइडेनले पुनःनिर्वाचनको अभियान अन्त्य गर्ने निर्णय गर्नुभएको थियो ।
सन् २०२० मा ट्रम्पले जो बाइडेनलाई आमन्त्रित गर्न अस्वीकार गर्नुभएको थियो । किनकि ट्रम्पँले चुनाव नहारेको झूठो दाबी गरिरहनु भएको थियो ।
भेटवार्तामा सत्ता हस्तान्तरण र यसको प्रक्रियाको बारेमा छलफल भएको बताइएको छ । यस भेटमा ट्रम्प आफ्नो नयाँ टिमसहित ह्वाइटहाउस पुग्नु भएको थियो । जसमा उहाँले नियुक्त गरेकी चिफ अफ स्टाफ सिसे वाइल्स पनि रहनु भएको थियो ।
बाइडेनले ट्रम्पलाई ह्वाइटहाउसमा स्वागत गर्दै सत्ताको सहज हस्तान्तरण हुने स्पष्ट पार्नुभयो । ट्रम्पले पनि ह्वाइटहाउसमा पुनः आउन पाउदा खुशी लागेको उल्लेख सत्ता हस्तान्तरणको प्रक्रिया सहज रुपमा अगाडी बढिरहेकोमा सन्तोष व्यक्त गर्नुभएको बताइएको छ ।
नोभेम्बर ५ को निर्वाचनमा डेमोक्रेटिक उम्मेदवार कमला ह्यारिसलाई पराजित गरेपछि ट्रम्पले ह्वाइटहाउसमा शानदार कम ब्याक गर्नुभएको हो ।