इजरायलमा नयाँ रक्षामन्त्री नियुक्त भएपछि विरोध प्रदर्शन , अमेरिकाले भन्यो सहकार्य गर्न तयार छौ
प्रकाशित मिति : कार्तिक २०, २०८१ मंगलबार
इजरायलका रक्षामन्त्री योआभ ग्यालान्टलाई प्रधानमन्त्री बेन्जामिन नेतान्याहुले बर्खास्त गरेपछि विरोध प्रदर्शन सुरु भएको छ ।
नेतान्याहुले ग्यालान्टसँगको सम्बन्धमा विश्वासको संकट आएको ले हटाउनु परेको बताउनु भएको छ । ग्यालान्टको स्थानमा परराष्ट्रमन्त्री इजरायल काट्जलाई नियुक्त गरिएको छ ।
हटाइएपछि ग्यालान्टले सामाजिक सञ्जालमा इजरायलको सुरक्षा मेरो जीवनको मुख्य उद्देश्य रहिरहनेछ भन्दै प्रतिक्रिया दिनुभएको छ । उहाँले यसअघि युद्धकै बीच भए पनि हमाससँग बन्धक सम्झौतालाई प्राथमिकता दिनुपर्ने बताउनु भएको थियो ।
नेतान्याहु र ग्यालान्टको सम्बन्ध लामो समयदेखि तिक्ततापूर्ण रहँदै आएको छ । गत वर्ष इजरायलको युद्ध रणनीतिमा तीव्र मतभेद र विवाद भएको खबर सार्वजनिक भएको थियो ।
पूर्व रक्षामन्त्री ग्यालान्ट इजरायलका अल्ट्रा अर्थोडक्स नागरिकहरूलाई सैन्य सेवाबाट छुट दिने योजनामा पनि असन्तुष्ट रहनु भएको थियो ।
गाजाको युद्ध सुरु हुनु केही महिनाअघि सन् २०२३ को मार्चमा नेतान्याहुले राजनीतिक मतभेदका कारण ग्यालान्टलाई हटाउनु भएको थियो । तर जनताको व्यापक विरोधपछि उहाँलाई पुनः नियुक्त गरिएको थियो ।
तर, मंगलबार नेतान्याहुले युद्धको मध्यमा प्रधानमन्त्री र रक्षामन्त्रीबीच पूर्ण विश्वास आवश्यक रहेको बताउदै बर्खास्तीको बचाउनु गर्नुभयो ।
ग्यालान्टको बर्खास्तीको समाचार आएलगत्तै, नेतान्याहुको राजीनामा माग गर्दै प्रदर्शनकारीहरू सडकमा उत्रिएका छन् । धेरै प्रदर्शनकारीले नयाँ रक्षामन्त्रीलाई बाँकी रहेका गाजाका बन्धकहरूको रिहाइलाई प्राथमिकतामा राख्न आह्वान गरेका छन् ।
हमासद्वारा ७ अक्टोबरमा अपहरण गरिएका व्यक्तिहरूका परिवारहरूको समूहले पनि ग्यालान्टलाई बर्खास्त गरिएकोमा विरोध जनाउँदै यो कदमले बाँकी रहेका बन्धकहरूको रिहाइको सम्झौतामा बाधा पु¥याउने प्रयास भएको बताएका छन् ।
ग्यालान्टको स्थानमा नियुक्त गरिएका काट्ज थप कठोर सैन्य रणनीतिका लागि प्रख्यात मानिनुहुन्छ ।
अमेरिकी राष्ट्रपतिको निर्वाचनकै दिन ग्यालान्टलाई बर्खास्त गरिएको खबर इजरायली मिडियामा चर्चाको विषय बनेको छ । ग्यालान्टको ह्वाइट हाउससँग नेतान्याहु भन्दा राम्रो सम्बन्ध रहेको मानिन्छ ।
अमेरिकी राष्ट्रिय सुरक्षा परिषद्को प्रतिनिधिले ग्यालान्ट इजरायलको सुरक्षासम्बन्धी मामिलामा महत्त्वपूर्ण साझेदार रहेको बताउँदै नयाँ रक्षामन्त्रीसँग पनि सहकार्य गर्ने प्रतिबद्धता जनाएको छ ।
विश्लेषकहरूले नेतान्याहु अल्ट्रा अर्थोडक्स नागरिकहरूलाई सैन्य सेवाबाट छुट दिने विधेयकलाई अघि बढाउन दबाबमा रहेको अवस्थामा ग्यालान्टको बर्खास्ती भएको बताउँदै छन् । ग्यालान्ट यस विधेयकको विपक्षमा रहनु भएको थियो ।