अमेरिकी उपविदेशमन्त्री रिचर्ड नेपाल भ्रमणमा , उच्च स्तरीय अधिकारीलाई भेट्ने कार्यक्रम
प्रकाशित मिति : श्रावण ३२, २०८१ शुक्रबार
अमेरिकी उपविदेशमन्त्री रिचर्ड बर्मा नेपाल आइपुग्नु भएको छ । व्यवस्थापन तथा स्रोत सम्बन्धी उपविदेशमन्त्री बर्मा नेपाल आइपुगेको सामाजिक सञ्जाल मार्फत काठमाडौंस्थित अमेरिकी दूतावासले जानकारी दिएको छ । उहाँलाई अमेरिकी राजदूत डिन थम्पनले स्वागत गर्नुभएको छ ।
केपी शर्मा ओली प्रधानमन्त्रीमा नियुक्त भएपछि यो अमेरिकाबाट भएको सबैभन्दा उच्च स्तरीय भ्रमण हो । उहाँले राष्ट्रपति रामचन्द्र पौडेल, प्रधानमन्त्री केपी शर्मा ओली, परराष्ट्र मन्त्री आरजु राणा देउवालगायत विभिन्न उच्च स्तरीय अधिकारीलाई भेट्ने नेपालस्थित अमेरिकी दूतावास स्रोतले जनाएको छ ।
अमेरिकास्थित विदेश मन्त्रालयका अनुसार नेपालमा उप विदेशमन्त्री वर्मासहितको प्रतिनिधि मण्डलले वरिष्ठ सरकारी अधिकारी, विकास परियोजनाका प्रतिनिधि तथा व्यापार व्यवसायीका प्रतिनिधिहरुलाई भेट्ने कार्यक्रम रहेको छ ।
आर्थिक विकास, महिला सशक्तीकरण, ऊर्जालगायतका क्षेत्रमा भएको समझदारीलगायतको विषयमा उहाँले छलफल गर्ने बताइएको छ ।
नेपालको एक दिने भ्रमण सकाएर उहाँ शनिवार भारतका लागि प्रस्थान गर्ने बताइएको छ । अमेरिकी आर्मीमा समेत काम गरिसकेका उहाँ भारतका लागि पूर्व अमेरिकी राजदूत पनि हुनुहुन्छ ।
भारतीय विदेश मन्त्रालयका विदेश सचिव विक्रम मिस्री फर्केको चार दिनपछि अमेरिकी विदेश मन्त्रालयका उपविदेशमन्त्री रिचार्ड आर वर्मा नेपाल आउनु भएको हो ।