नवलपरासीमा बाख्राको संख्या पौने २ लाख पुग्यो , बाख्रापालनमा किसानको आकर्षण
प्रकाशित मिति : श्रावण २८, २०८१ सोमबार
नवलपरासी बर्दघाट सुस्तापूर्वका किसान व्यावसायिक बाख्रापालनतर्फ आकर्षित हुन थालेका छन् ।
कम समयमा बढी आम्दानी हुने भएपछि यहाँका किसान बाख्रापालनतर्फ आकर्षित भएका हुन् ।
गत आर्थिक वर्षमा जिल्लामा बाख्रापालन गर्ने किसान, व्यावसायिक फार्म र उत्पादित खसीबोका वृद्धि भएको भेटेरिनरी अस्पताल तथा पशु सेवा विज्ञ केन्द्रका प्रमुख ऋषभ गुरागाईँले बताउनुभयो ।
आव २०७९/८० मा भन्दा २०८०/८१ मा बाख्रापालन गर्ने किसानको सङ्ख्यामा उल्लेख्य वृद्धि भएको र यसले उत्पादन पनि बढेको पाइएको छ ।
आव २०८०/८१ मा नयाँ १८ बाख्रा फार्म दर्ता भई सञ्चालनमा आएका छन् । अहिले जिल्लामा व्यावसायिक बाख्रा फार्मको सङ्ख्या २ सय ७४ पुगेको छ उहाँले भन्नुभयो ।
आव २०७९/८० मा दर्ता भएका बाख्रा फार्म २ सय ५६ थियो । फार्म नै दर्ता गरेर बाख्रापालन गर्नेको अनुपातमा व्यक्तिगत रूपमा खोर बनाएर बाख्रा पाल्ने सङ्ख्या अझ उल्लेख्य रहेको पाइएको छ ।
जिल्लामा आव २०७९/८० मा १ लाख ४३ हजार ९ सय ९० वटा बाख्रा रहेकामा गत आवमा सो सङ्ख्या २३ हजार सात सय ८९ ले थप भई १ लाख ६७ हजार ७ सय ७९ पुगेको विज्ञ केन्द्रको तथ्याङ्कमा देखिएको छ ।
पछिल्लो ३ वर्षमा जिल्लामा ४५ हजार २ सय २२ बाख्रा थप भएका छन प्रमुख गुरागाईँले भन्नुभयो
आव २०७९/८० मा खसीबोकाको मासु ५ सय ८१ मेट्रिक टन उत्पादन भएकामा गत आवमा ९५ मेट्रिक टनले वृद्धि भई ६ सय ७६ मेट्रिक टन पुगेको प्रमुख गुरागाईँले बताउनुभयो ।
जिल्लामा उत्पादन भएको खसीबोका किसान आफैँले बिक्री गर्ने गरेका छन् भने केही सहकारीमार्फत सङ्कलन गरेर बिक्री गर्ने गरिएको छ ।