मेगा मिलियन्स १.५५ बिलियन डलर पुगेपनि लोटरी टिकटको साटो स्टकमा लगानी गर्न विज्ञको सुझाव
प्रकाशित मिति : श्रावण २०, २०८० शनिबार
अमेरिकामा शुक्रबार पनि कसैलाई नपरेपछि मेगा मिलियन्स लोटरी अब १ दशमलव ५५ बिलियन डलर पुगेको छ । शुक्रबार रातिका सबै ६ नम्बरहरू कसैले पनि मिलाउन नसकेपछि अब यो ज्याकपट अब अहिलेसम्मकै इतिहासमा सबैभन्दा ठूलो मेगा मिलियन्स ज्याकपट भएको छ । तर पनि विज्ञहरुले भने लोटरी टिकटको साटो स्टक किन्न सुझाव दिएका छन् । किनभने मेगा मिलियन्स ज्याकपट पर्ने सम्भावना ३०२ मिलियनमा एकमात्र हुनेगर्छ ।
लामो अनुसन्धानले देखाउँछ कि स्टक बजार लोटरी किन्नुभन्दा राम्रो विकल्प हो। लोटरीको सपना देख्ने कुनै व्यक्तिले सन् २००२ देखि लोटरी टिकटहरूमा प्रत्येक महिना ४० डलर खर्च गरेमा यो रकम प्रत्येक वर्ष ४८० डलर हुन आउँछ । त्यो सबै रकम प्राय हार्ने सम्भावनामा नै पर्छ । यसरी हिसाब गर्दा २० बर्षमा तपाईले झण्डै १० हजार डलर गुमाउनुहुनेछ ।
लोटरी सपना देख्नुको सट्टा त्यो व्यक्ति स्टक मार्केटमा लगानी गरेको खण्डमा बढी नाफा कमाउन सक्ने विज्ञहरु बताउँछन् । उक्त व्यक्ति हरेक महिना ४० डलर एस एण्ड पी ५०० मा हालेको भएमा उक्त व्यक्तिले २० बर्षमा झण्डै २२ हजार डलर नाफा कमाउन सक्थ्यो । उक्त स्टकको बार्षिक बृद्धिदर सन् २००२ देखि २०२२ सम्म ८ प्रतिशत रहेको थियो ।