ग्रिनकार्ड आवेदकका २१ बर्ष नपुगेका छोराछोरीलाई फाइदा पुग्नेगरी युएससीआईएसले ल्यायो नयाँ नीति
प्रकाशित मिति : फाल्गुन ३, २०७९ बुधबार
बाइडेन प्रशासनले बाल स्थिति संरक्षण ऐन अन्तर्गत केही परिस्थितिहरूमा गैर नागरिकको उमेर गणना गर्ने उद्देश्यका लागि नीति म्यानुअल अपडेटको घोषणा गरेको छ । जुन एज आउट हुनेहरुको समस्यालाई सम्बोधन गर्न एउटा सानो तर महत्त्वपूर्ण कदमको रूपमा हेरिएको छ।
परिवारमा आधारित वा रोजगारीमा आधारित आप्रवासी भिसा वा ग्रिनकार्डको लागि अभिभावकको स्वीकृत निवेदनको आधारमा बच्चाले अमेरिकामा ग्रिनकार्ड प्राप्त गर्नको लागि बच्चा सामान्यतया २१ वर्ष भन्दा कम उमेरको हुनुपर्छ। यदि बच्चा २१ वर्षको भएमा वा एजआउट भएमा आमाबाबुको निवेदनको आधारमा सिधै ग्रिनकार्ड पाउन योग्य हुँदैन।
यसलाई केहीहदसम्म सम्बोधन गर्न युएससीआईएसले आधिकारिक रूपमा लामो समयदेखि अनुरोध गरिएको नीति परिवर्तन गरेको हो । युएससीआइएसले बच्चाको उमेर निर्धारण गर्न अबदेखि फाइलिङ चार्टको मितिहरू प्रयोग गर्ने भएको छ । जसका आधारमा पहिले अस्वीकार गरिएको निवेदन समेत पुन खोल्न सकिने जनाइएको छ ।
अहिलेसम्म युएससीआईएसले यो प्रयोजनका लागि भिसा बुलेटिनको फाइनल एक्सन मिति प्रयोग गर्दै आएको थियो । अब बुबाआमाको परिवार र रोजगारमा आधारित स्वीकृत ग्रिनकार्ड आवेदनमा फाइलिङ चार्टको मिति करेन्ट हुँदा बच्चाको उमेर २१ बर्ष नाघेको छैन भने उक्त बच्चाले बाबुआमासँगै आप्रवासी भिसा वा ग्रिनकार्ड प्राप्त गर्न सक्नेछ ।
नयाँ नीति अन्तर्गत युएससीआईएसले अब बाबुआमासँगै २१ बर्ष नपुगेका छोराछोरीले ग्रिनकार्ड वा आप्रवासी भिसा पाउने उद्देश्यका लागि गैर नागरिकहरूको उमेर गणना गर्न फाइलिङ चार्टका मितिहरू प्रयोग गर्नेछ । जसले गैर नागरिकहरूलाई उनीहरूको स्थिति समायोजन गर्न योग्यता बारे थप निश्चितता प्रदान गर्ने युएससीआईएसले जनाएको छ ।
अमेरिकी विदेशमन्त्रालयको भिसा बुलेटिन भिसा नम्बर कहिले उपलब्ध हुन्छ भनेर निर्धारण गर्न प्रयोग गरिन्छ। भिसा बुलेटिनमा दुईवटा चार्टहरू छन् फाइलिङको मिति र फाइनल मिति चार्ट। चाहे गैर नागरिकले चार्टमा फाइलिङ मिति प्रयोग गरेर ग्रिनकार्डका लागि आवेदन दिएतापनि अहिलेसम्म युएससीआईएसले फाइनल एक्सन चार्टमा आधारित रहेर उमेर गणनाको उद्देश्यका लागि छोराछोरीहरुको योग्यता निर्धारण गर्दै आएको थियो ।
युएससीआईएसको यो नीति परिवर्तन तुरुन्तै प्रभावकारी हुने र विचाराधीन आवेदनमा समेत लागू हुने जनाइएको छ । त्यसकारण पेन्डिङ आवेदन भएका केही गैर नागरिकहरूले अब यो परिवर्तनको आधारमा आफ्ना छोराछोरीहरुको पनि आफूसँगै आप्रवासी भिसा वा ग्रिनकार्ड पाउन सक्छन् ।
यदि कोही गैर नागरिकहरू नीति परिवर्तनको कारणले आफ्नो स्थिति समायोजन गर्न योग्य छन् र तिनीहरूले स्थिति समायोजनको लागि दायर गरेका छन् भने तिनीहरू पनि ग्रिनकार्ड आवेदन पेन्डिङ रहेको आधारमा वकै परमिट वा यात्रा गर्न एड्भान्स परोलका लागि आवेदन दिन योग्य हुनेछन् ।