अमेरिकामा अस्थायी गैर कृषि कामदारका लागि झण्डै ६५ हजार भिसा थप, आजदेखि आवेदन
प्रकाशित मिति : मंसिर २६, २०७९ सोमबार
अमेरिकामा डिपार्टमेन्ट अफ होमल्याण्ड सेक्युरिटीले आर्थिक बर्ष २०२३ का लागि थप झण्डै ६५ हजार अस्थायी गैर कृषि कामदारका भिसा उपलब्ध गराउने अस्थायी अन्तिम नियम प्रकाशित गरेको छ । यी भिसाहरु सामान्यतया प्रत्येक आर्थिक वर्षमा उपलब्ध हुने ६६ हजार भिसाबाहेक थप गरिएका भिसाहरु हुन् ।
रोजगारदाताहरुले थप ६४ हजार ७ सय १६ एच टु बी भिसाका लागि आवेदन दिन सक्नेछन् । थप अस्थायी कामदारहरूको लागि रोजगारदाताहरूको आवश्यकतालाई सम्बोधन गर्न यी भिसाहरुका लागि आगामी सेप्टेम्बर १५ अगाडिका लागि उपलब्ध हुनेछन् ।
थप गरिएकामध्ये २० हजारभिसा हाइटी र मध्य अमेरिकी देश होन्डुरस, ग्वाटेमाला र एल साल्भाडोरका कामदारहरूका लागि छुट्याइएको छ । १८ हजार २ सय १६ भिसा आगामी मार्च ३१ वा सोभन्दा अगाडि काम थाल्नेहरुका लागि उपलब्ध हुनेछन् । यी भिसाहरु कुनै आर्थिक बर्षमा यस्तो भिसा लिएका वा स्वीकृत भएका र अहिले काममा पुन फर्कनेहरुका लागि उपलब्ध हुनेछन् भने डिसेम्बर १२ देखि आवेदन दिन सकिनेछ ।
१६ हजार ५ सय भिसाहरु अप्रिल १ देखि मे १४ भित्र बाम थाल्नेहरुका लागि उपलब्ध हुनेछन् । त्यस्तै १० हजार भिसाहरु मे १५ देखि सेप्टेम्बर ३० भित्र काम थाल्नेहरुका लागि उपलब्ध हुनेछन् ।
रोजगारदाताहरुले पहिले नै अमेरिकामा एच टु बी भिसामा रहेकाहरुलाई नयाँ आवेदन स्वीकृत हुँदासम्म प्रतिक्षा नगरी तुरुन्तै काममा लगाउन सक्नेछन् ।
रोजगार दाताले अस्थायी गैर कृषि कामदार भिसामा कसैलाई राख्नका लागि उनीहरुको व्यवसायमा अतिरिक्त एच टु बी कामदारहरु नराखेको खण्डमा नोक्सान पुग्ने देखाउनुपर्नेछ ।
यसपटक थपिएका भिसाहरु आर्थिक बर्ष २०२३ का लागिमात्र लागु हुनेछन् भने यसले आगामी आर्थिक बर्षका भिसाहरुमा कटौती वा नकारात्मक असर गर्नेछैन ।
यो भिसामा कामदार ल्याउन चाहने रोजगारदाताहरुले तोकिएको कामका लागि अमेरिकामा कामदारहरु नपाएको, अमेरिकामा हुने कामदारहरु काम गर्न इच्छुक नभएको वा योग्य नभएको प्रमाणित गर्नुपर्छ । यो भिसाका लागि रोजगारदाताले आई १२९ आवेदनका साथमा लेबर सर्टिफिकेशन समेत पेश गर्नुपर्छ । यो भिसाका लागि कामदार आफैले आवेदन दिन मिल्दैन ।
अस्थायी गैर कृषि कामदारहरु अमेरिका पठाउनका लागि ८४ देशहरु योग्य छन् । सुचीमा नभएका देश बाहेक अन्य देशका आवेदकका सन्दर्भमा अमेरिकाको राष्ट्रिय रुचीमा परेको खण्डमा युएससीआईएसले तजविज अधिकारका आधारमा आवेदन स्वीकृत गर्न सक्नेछ ।
नेपाल सुचीमा रहेको छैन । तर विभिन्न अवस्थाको मूल्यांकन गरेर युएससीआईएसले नेपाली आवेदकको समेत अस्थायी कृषि तथा गैर कृषि भिसा आवेदन स्वीकार गर्न सक्नेछ ।