१११ बर्षकी महिलाले लिइन् अमेरिकी नागरिकता
प्रकाशित मिति : मंसिर १६, २०७९ शुक्रबार
१११ बर्षकी एक महिलाले अमेरिकी नागरिकता लिएको युएससीआईएसले जनाएको छ । सिरियाका एन्टेन्जा कुएलर नामकी क्युबाकी महिलाले ओर्लान्डो कार्यालयमा अमेरिकाको नागरिकताको सपथग्रहण गरेको युएससीआईएसले जनाएको छ ।
अमेरिकी नागरिकता लिंदा उनी छोरी र ज्वाइँसँगै थिइन् । शताब्दी नाघेकाहरुसँगको भेटघाट सधैं विशेष हुने भन्दै युएससीआईएसले ती महिलालाई बधाई तथा शुभकामना दिएको छ ।
यदि तपाईं शारीरिक वा विकासात्मक असक्षमता वा मानसिक अपाङ्गता भएको खण्डमा अमेरिकी नागरिकताका लागि परीक्षामा छुट प्रदान गरिन्छ । अन्यथा अमेरिकी नागरिकताका लागि अमेरिकी राजनीति, भुगोल, इतिहास लगायतका १० वटा प्रश्नहरु सोधिन्छ भने त्यसमध्ये ६ वटाको सही जवाफ दिन आवश्यक हुन्छ ।
नागरिकताका लागि फाइल गर्दा ५० वर्ष वा सोभन्दा माथिको उमेर भएमा र अमेरिकामा २० वर्षदेखि स्थायी बासिन्दा भएको खण्डमा अँग्रेजी भाषा परीक्षामा छुट दिइन्छ । त्यस्तै नागरिकताका लागि फाइल गर्दा ५५ वर्ष वा सोभन्दा माथिको उमेर भएमा र अमेरिकामा १५ वर्षदेखि स्थायी बासिन्दा भएको खण्डमा पनि अँग्रेजी भाषा परीक्षामा छुट दिइन्छ । यो अवस्थामा आफ्नो भाषामा सिभिक परीक्षा दिन पाइन्छ भने अनुवादक लैजानुपर्छ ।
यदि नागरिकता आवेदन दिएको व्यक्ति ६५ वर्ष वा माथिको भएको र नागरिकता फाइल गर्दा कम्तिमा २० बर्षभन्दा बढी अमेरिकाको स्थायी बासिन्दा भएको सन्दर्भमा पनि विशेष छुट दिइन्छ ।
अमेरिकाको अध्यागमन एवं राष्ट्रियता ऐनको सेक्सन ३१२ मा अमेरिकी नागरिकता प्राप्त गर्नका लागि अमेरिकाका बारेमा ज्ञान भएको तथा सामान्य अँग्रेजी बोल्न, लेख्न र पढ्न सक्ने हुनुपर्ने प्रावधान रहेको छ । अमेरिकी नागरिकताको अन्तरवार्ता ९० प्रतिशतले उत्तिर्ण गर्ने तथ्यांक रहेको छ । अन्तरवार्ताका क्रममा सोधिने सबै प्रश्नहरु सजिला भने हुँदैनन् ।