अगस्तमा कस्ले ग्रिनकार्ड फाइल गर्ने? युएससीआईएसबाट तालिका प्रकाशन
प्रकाशित मिति : असार ३०, २०७९ बिहीबार
आगामी अगस्त महिनामा कुन प्राथमिकता मिति भएका अमेरिकामा भएका आवेदकले ग्रिनकार्ड आवेदन दिनसक्ने भन्नेबारे युएससीआईएसले तालिका प्रकाशन गरेको छ । परिवारमा आधारित ग्रिनकार्डका सन्दर्भमा युएससीआईएसले भिसा बुलेटिनमा उल्लेख भएका आवेदन दिने मितिलाई सदर गरेको छ भने रोजगारमा आधारित ग्रिनकार्डका सन्दर्भमा भिसा बुलेटिनमा उल्लेख भएको ग्रिनकार्ड पाउने मितिलाई सदर गरेको छ ।
जस अनुशार अमेरिकी नागरिकका अविवाहित छोराछोरीका सन्दर्भमा सन् २०१६ को अगस्त ८ भन्दा अगाडि प्राथमिकता मिति भएकाहरुले आगामी अगस्तमा ग्रिनकार्ड आवेदन आई ४८५ दिन सक्नेछन् । ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीका लागि भने अगस्तमा पनि भिसा करेन्ट रहेको छ । अर्थात् उनीहरुले आई १३० का साथमा नै ग्रिनकार्ड आवेदन आई ४८५ दिनसक्नेछन् ।
ग्रिनकार्डवाहकका २१ बर्ष नाघेका छोराछोरीका सन्दर्भमा सन् २०१७ को जनवरी १ अगाडि प्राथमिकता मिति हुनेहरुले आगामी अगस्तमा ग्रिनकार्ड आवेदन दिनसक्नेछन् । अमेरिकी नागरिकका विवाहित छोराछोरीका सन्दर्भमा सन् २००९ को नोभेम्बर ८ भन्दा अगाडि प्राथमिकता मिति हुनेहरुले आगामी अगस्तामा ग्रिनकार्ड फाइल गर्नसक्नेछन् ।
अमेरिकी नागरिकका दाजुभाई दिदीबहिनीहरुका सन्दर्भमा सन् २००७ को डिसेम्बर १५ भन्दा अगाडि प्राथमिकता मिति हुनेहरुले आगामी अगस्तमा ग्रिनकार्ड फाइल गर्न सक्नेछन् । अमेरिकामा हुने आवेदकका सन्दर्भमामात्र युएससीआईएसको आवेदन तालिका लागु हुन्छ । उनीहरुले ग्रिनकार्ड आवेदन आई ४८५ आवेदन दिइसकेपछि ग्रिनकार्ड प्राप्त नहुँदासम्म वर्क परमिट र एड्भान्स परोलसमेत प्राप्त गर्नसक्छन् । उनीहरुलाई स्टाटस जोगाउने झन्झट पनि हुँदैन ।
त्यस्तै अगस्तमा रोजगारमा आधारित ग्रिनकार्ड आवेदकका सन्दर्भमा पनि कस्ले ग्रिनकार्ड फाइल गर्नसक्ने भन्नेबारे युएएससीआईएसले तालिका प्रकाशन गरेको छ । अगस्तमा रोजगारमा आधारित दक्षता नभएका तेश्रो श्रेणीका अन्य कामदारबाहेक अरु सबैले आई १४० आवेदनका साथमा ग्रिनकार्ड आवेदन आई ४८५ दिन सक्नेछन् ।
२ बर्षभन्दा कम अवधि खास दक्षता नचाहिने काम गरेको अनुभव, उक्त कामका लागि अमेरिकामा कामदार नभएको अवस्था र लेबर सर्टिफिकेशनका अन्य प्रावधानहरु पूरा गरेका व्यक्ति रोजगारमा आधारित तेश्रो श्रेणीको अन्य कामदारमा योग्य हुनसक्छन् । यो श्रेणीमा अमेरिकामा नेपालीहरुको संख्या ठूलो रहेको छ । तर उनीहरुका लागि भिसा करेन्ट नहुँदा भिसा करेन्ट हुँदासम्मका लागि स्टाटस जोगाउन निकै समस्या हुनेगरेको छ ।