परिवारमा आधारित ग्रिनकार्डका लागि आई १३० आवेदन दिंदा यस्तो गल्ती नगरौं
प्रकाशित मिति : असार २४, २०७९ शुक्रबार
परिवारमा आधारित ग्रिनकार्ड आई १३० आवेदनमा ढिलाई हुन र अतिरिक्त शुल्कबाट बच्न युएससीआईएसले विशेष सुझावहरु दिएको छ । युएससीआईएसले आई १३० आवेदन स्वीकृत भइसकेपछि उचित स्थानमा फर्म पठाउने सुनिश्चित गर्नेगरी सुझावहरु अपडेट गरिएको हो ।
खासगरी फर्म आई १३० भर्दा ग्रिनकार्ड पाउने व्यक्तिको ग्रिनकार्ड आवेदन अमेरिकाभित्रै प्रकृयामा लैजाने वा अमेरिकाबाहिरका अमेरिकी दूतावास तथा कन्सुलेटमा प्रकृयामा लैजाने भन्नेबारे आवेदकले उल्लेख गर्नुपर्छ । कागजी फर्म भर्दा यी प्रश्नहरु ६१ र ६२ नम्बरमा रहेका छन् भने अनलाइनबाट फर्म भर्दा पनि यी प्रश्नहरु राखिएका छन् ।
फर्म भर्दा दुबै विकल्पहरु छनौट गर्न सकिने भएतापनि आवेदकले एउटमात्र विकल्प छनौट गर्नुपर्छ । ग्रिनकार्ड पाउने व्यक्ति अमेरिकाभित्रै भएको खण्डमा अमेरिकाभित्रै ग्रिनकार्ड प्रकृयामा लैजाने विकल्प छान्नुपर्छ भने अमेरिबाहिर भएको खण्डमा दूतावास वा कन्सुलेटमा ग्रिनकार्ड प्रकृयामा लैजाने विकल्प छान्नुपर्छ ।
यदि विदेशमा कन्सुलर प्रकृयामा लैजाने विकल्प छनौट गरिएको खण्डमा युएससीआईएसले आई १३० आवेदन स्वीकृत भइसकेपछि आवेदन नेशनल भिसा सेन्टरमा पठाउँछ । त्यसपछि सम्बन्धित दूतावास वा कन्सुलेटमार्फत आप्रवासी भिसा प्रकृया अगाडि बढाउनुपर्छ ।
यदि अमेरिकामै ग्रिनकार्ड प्रकृयामा लैजाने विकल्प छनौट गरेको खण्डमा युएससीआईएसले स्वीकृत भएको आई १३० आवेदन नेशनल रेकर्ड सेन्टरमा पठाउँछ । त्यसपछि ग्रिनकार्ड प्राप्त गर्ने व्यक्तिले भिसा करेन्ट हुन्जेल प्रतिक्षा गरेर ग्रिनकार्ड आवेदन आई ४८५ दिनुपर्छ ।
यदि आई १३० आवेदन युएससीआईएसमा नै पेन्डिङ रहेको अवस्थामा अमेरिकाभित्रै ग्रिनकार्ड प्रकृयामा लैजाने वा दूतावास तथा कन्सुलेटमार्फत प्रकृयामा लैजाने विकल्प परिवर्तन गर्नुपरेमा युएससीआईएसको सम्पर्क केन्द्रमा सम्पर्क गर्नुपर्छ ।
तर आई १३० आवेदन पहिले नै स्वीकृत भइसकेको छ भने फर्म आई ८२४ भरेर युएससीआईएसमा पठाउनुपर्छ । त्यसका लागि ४६५ डलर शुल्क तिनुपर्छ भने उक्त आवेदनमा निर्णय आउन साढे ३ महिनादेखि साढे २२ महिनासम्म लाग्छ ।
त्यसैले आवेदनमा ढिलो हुनबाट र अतिरिक्त शुल्क तिर्ने अवस्था आउनबाट जोगिन आई १३० आवेदन दिंदा एउटामात्र उचित विकल्प छनौट गर्नुपर्छ । नागरिकता र अध्यागमन सेवा ओम्बड्सम्यानको कार्यालयले आवेदकहरुले दुईवटै विकल्प छनौट गरेका कारण समस्या आएका कैयन आवेदनहरु रहेको बताएको छ । जसका कारण अमेरिकाबाहिर हुनेहरुका आवेदनसमेत युएससीआईएसले अमेरिकाभित्र प्रकृयामा लैजानका लागि नेशनल रेकर्ड सेन्टरमा पठाउने गरेको छ । जबकी अमेरिकाबाहिर हुनेको ग्रिनकार्ड प्रकृया नेशनल रेकर्ड सेन्टरबाट अगाडि बढ्दैन ।
यदि अमेरिकाबाहिर रहेका लाभग्राहीका सन्दर्भमा दुईवटै विकल्प छनौट गरेर आवेदन दिइएको छ भने आवेदकले ४६५ डलर शुल्क तिरेर आई ८२४ आवेदन युएससीआईएसमा पठाउनुपर्छ । त्यसपछिमात्र युएससीआईएसले स्वीकृत आई १३० नेशनल भिसा सेन्टरमा पठाउँछ ।
यदि आवेदकले विदेशमा रहेका दूतावास वा कन्सुलेटबाट प्रकृया अगाडि बढाउनेगरी एउटामात्र विकल्प छनौट गरेको अवस्थामा समेत युएससीआईएसले आई १३० आवेदन स्वीकृत भएको २ महिनाभित्र आवेदन नेशनल भिसा सेन्टरमा नपठाएको खण्डमा त्यो युएससीआईएसको गल्तीका कारण हुनसक्छ । यो अवस्थामा भने शुल्क तिरेर आई ८२४ आवेदन दिनुपर्दैन । यो अवस्थामा ओम्बड्सम्यानमा सम्पर्क गरेर अनुरोध गर्नुपर्छ । त्यसो गर्दा पहिले भरेको आई १३० को कपी र युएससीआईएसमा सम्पर्क गरेर समस्या समाधानको प्रयास गरेको कागजात पठाउनुपर्छ ।
युएससीआईएससँग कुनै समस्या भएको खण्डमा नागरिकता र अध्यागमन सेवा ओम्बड्सम्यानको कार्यालयले आवेदक र रोजगारदातालाई सहयोगको प्रयास गर्छ । नागरिकता र अध्यागमन सेवा ओम्बड्म्यानको कार्यालयले युएससीआईएस र सेवाग्राहीबीच सम्बन्धको काम गर्छ । युएससीआईएससँग आवेदकको समस्या भएमा समाधानको प्रयास गर्नुका साथै युएससीआईसँग सेवाग्राहीको अनुभवहरु समेत सुन्ने काम गर्छ । अध्यागमन प्रणालीमा भएका समस्या पहिचान गरेर यो कार्यालयले युएससीआईएसलाई सिफारिस समेत गर्छ ।