अमेरिकामा एसाइलम खोज्नेलाई ग्वाटेमाला, होण्डुरस, एल साल्भाडोर पठाइने (नयाँ नियमको पूर्ण पाठ)
प्रकाशित मिति : मंसिर २, २०७६ सोमबार
ट्रम्प प्रशासनले ग्वाटेमाला, होण्डुरस, एल साल्भाडोर लगायतका मुलुक हुँदै अमेरिकी सिमाक्षेत्रमा आएर एसाइलम दावी गर्नेहरुलाई ती मुलुकहरुमा नै फिर्ता पठाउन नयाँ नियम प्रकाशित गर्ने तयारी गरेको छ । उक्त नियमको प्रति सोमबार अनलाइनमा राखिएको छ ।
पूर्ण पाठ यहाँ हेर्न सक्नुहुनेछ ।
ती देशहरुहुँदै अमेरिका आउनेहरुले ती देशमा एसाइलम आवेदन दिएर अस्वीकृत भएको खण्डमामात्र अमेरिकामा एसाइलमका लागि योग्य हुनेछन् । त्यसैले ती देशहुँदै अमेरिका आएका तर ती देशमा एसाइलम दावी नगरेकाहरुलाई त्यही फिर्ता पठाउने तयारी गरिएको हो ।
तीनमध्ये कुनै देशमा पठाउनका लागि मेक्सिको सिमाक्षेत्रमा आएर एसाइलम दावी गर्नेहरुलाई तीब्र गतिको देशनिकालामा राख्न सकिने जनाइएको छ । यसअगाडि यी तीनदेशसँगको अमेरिकाको सहमति चर्चामा आएपनि कसरी कार्यान्वयन हुने भन्नेबारे केही बताइएको थिएन ।
आप्रवासी अधिकारकर्मीहरुले अमेरिका र तीनदेशबीच भएको उक्त सहमतिको विरोध गरेका छन् । अमेरिकामा एसाइलम खोज्नेलाई तेश्रो देशमा पठाउने सहमति उचित नभएको उनीहरुको भनाई छ ।
विगत ६ महिनामा भएका एसाइलमका दुई कडा नियमपछि यो नियम आएको हो । यसअगाडि अमेरिका आउने क्रममा बाटोमा पर्ने देशमा एसाइलम दावी गरेर अस्वीकृत नभएकाहरुलाई अमेरिकामा एसाइलम आवेदन दिन अयोग्य बनाउने नियम आएको थियो । त्यस्तै अमेरिकी सिमाक्षेत्रमा आएर एसाइलम दावी गर्नेहरुले अदालती सुनुवाईसम्मका लागि मेक्सिकोमा नै प्रतिक्षा गर्नुपर्ने नियम लागु गरिएको थियो ।
नयाँ नियम मंगलबार फेडरल रजिस्टरमा प्रकाशित गरिने छ ।
६४ पृष्ठ लामो उक्त नियमलाई अन्तरिम अन्तिम नियम बताइएको छ । उक्त नियम कहिलेदेखि कार्यान्वयन हुने भन्ने भोलि थाहा हुनेछ ।