बजेटमा नेपालीका हकहित समेट्न न्युजर्सीका गभर्नरलाई बिष्णुमायाको सुझाव
प्रकाशित मिति : चैत्र २७, २०७४ मंगलबार
अमेरिकामा चर्चित नेपाली सामाजिक अभियन्ता डाक्टर बिष्णुमाया परियारले न्युजर्सी राज्यको बजेटमा नेपाली समुदायका हकहितका विषय समेट्न राज्यका गभर्नरलाई सुझाव दिनुभएको छ । उहाँले न्युजर्सीका गभर्नर फिल मर्फीलाई न्युजर्सी राज्यमा बस्ने नेपाली समुदायलाई राज्यको बजेटले कसरी समेट्न सक्छ भन्ने विषयमा सुझाव दिनुभएको हो ।
सुझावका लागि गभर्नर मर्फीले नेपाली समुदायका तर्फबाट जर्सी सिटी शहरका मेयर स्टेभन फुलपकी सल्लाहकार डा. बिष्णुमाया परियारलाई निमन्त्रणा गरेका थिए । छलफलमा अन्य समुदायका सामाजिक अगुवाहरुको पनि प्रतिनिधित्व रहेको थियो । गभर्नर अफिसले न्युजर्सीमा रहेका आप्रवासी समुदायलाई बजेटमार्फत कसरी समेट्न सकिन्छ भन्ने सन्दर्भमा सुझावका लागि निमन्त्रणा दिएको थियो ।
गभर्नर मर्फीले न्युजर्सीको अमेरिकी डलर ३७.४ बिलियन डलर बजेटबाट स्थानीय कम्युनिटीको आवश्यकता अनुसार कसरी खर्च गर्न सकिन्छ भनेर समाजका अगुवाहरुसँग छलफल गरेका हुन् । छलफलमा मर्सर कम्यूनिटी कलेजकी प्रेसिडेण्ट जियानपिङ वाङ, ब्याङ्कर कृस्टिन बृजलाल, ब्याबसायी बबी पटेल, अमेरिकी एयर फोर्सका लेफ्टिनेण्ट कर्नेल मुकेश एन रोय, वकिल शर्मिला जाइपर्शाउद लगायत अन्य स्थानीय कम्युनिटी लिडरहरु सहभागी थिए ।
