स्याङ्जाको संयोगः सांसद, जिल्ला प्रमुख र मेयर तीनै पदमा महिला
प्रकाशित मिति : मंसिर २७, २०७४ बुधबार
२७ मंसिर, स्याङ्जा । नेपाली कांग्रेसभित्र शीर्ष बरियताका नेता एवं उपप्रधानमन्त्री तथा शिक्षामन्त्री गोपालमान श्रेष्ठलाई पराजित गरेपछि एमालेकी युवा नेतृ पद्माकुमारी अर्याल चर्चामा छिन् ।
एमाले केन्द्रीय सदस्य तथा स्याङ्जा जिल्ला इन्चार्ज अर्यालले गोपालमानबिरुद्ध चुनाव लड्न आँट गरेर खतरा मोलेकी थिइन् । गोपालमानले कांग्रेसका गढ रोजेर यसपटक सो क्षेत्रबाट चुनाव लडेका थिए ।
चापाकोट नगरपालिकाका ४ ओटा बुथ कब्जा पनि भए । पद्माकुमारी बुथ कब्जा रोक्न जाँदा आफैं कुटिइन्, मोबाइल फुटाइयो र उनलाई लखेटियो बुथबाट । उनले पुनः मतदानका लागि हार गुहार गरिन् । तर, गोपालमानको पावर अगाडि उनी निरीह बनिन् ।
लामो गलफत्तीपछि मतगणना शुरु हुँदा पद्माले शुरुदेखि नै अग्रता लिइन् । बुथ कब्जा भएको भनिएका चापाकोट नगरपालिकामा चार मतदान केन्द्रको मत गन्दा उनको अग्रता केही खुम्चियो । तर, गोपालमान अघि बढ्न सकेनन् । त्यसपछि स्याङ्जामा विजय उत्सव शुरु भयो, अन्ततः एमालेकी यी साहसी महिला नेतृले प्रभावशाली उपप्रधानमन्त्रीलाई पराजित गरिन् ।
पद्माकुमारी अर्यालको जितले यस अर्थमा पनि निकै चर्चा पाएको छ कि उनले कांग्रेस पार्टी र शेरवहादुर देउवा सरकारका शक्तिशाली पुरुष नेतालाई पराजित गरिन् । सत्ता र शक्तिसँग एउटी नारीको संघर्ष आफैंमा चुनौतिपूर्ण थियो, तर यो चुनौति उनले पार गरेकी छन् ।
पद्माले एमालेभित्र यसअघि नै पहिलो महिला जिल्ला अध्यक्ष भएर रेकर्ड बनाइसकेकी थिइन् । तत्कालिन ७५ जिल्लामध्ये एमालेबाट पहिलो पटक महिला अध्यक्ष त्यो पनि पार्टीभित्रको निर्वाचन जितेर बनेकी थिइन् उनी ।
यसपटक उनले चाहँदा समानुपातिकमा बस्न सक्थिन् । तर, कांग्रेसको गढमा कांग्रेसका शीर्ष नेतासँग चुनाव लड्न चाहिन् । पहिलोपटक गोपालमानलाई हार चखाइन् ।
त्यसो त स्याङ्जा अहिले महिला डोमिसनको जिल्लाका रुपमा चर्चामा आइसकेको छ । कुनै बेला पहिलो पटक महिला सिडिओ बनेर इन्दू शर्मा स्याङ्जा पुग्दा जसरी चर्चा भएको थियो, अहिले तीन महिलाका कारण स्याङ्जा पुनः चर्चामा छ । यो वर्ष स्याङ्जाको राजनीतिमा महिला छाएका छन् ।
६ महिनाअघि मात्र सम्पन्न स्थानीय चुनावमा स्याङ्जाको पुतलीबजार नगरपालिकामा एमाले नेतृ सीमा क्षेत्री मेयरमा निर्वाचित भइन् । देशभरबाट निर्वाचित सीमित महिला मेयरको सूचीमा सीमा क्षेत्री सामेल भइन् । उनले कांग्रेसका नेता तुलसीराम रेग्मीलाई पराजित गरेकी थिइन् ।
स्थानीय चुनाव लगत्तै स्याङ्जामा महिलाका लागि अर्को खुसीको अवसर आयो । जिल्ला समन्वय समिति स्याङ्जाको प्रमुखमा एमालेले दलित महिलालाई टिकट दियो । एमालेकी जिल्ला नेतृ सिता सुन्दास जिल्ला समन्वय समितिको प्रमुखका रुपमा अहिले जिल्लाका नेतृत्व गरिरहेकी छन् ।
पद्मा अर्यालको समेत बिजयले स्याङ्जामा यो वर्ष महिलाले सबै तहमा नेतृत्वको मौका पाएका छन् । पद्मा अर्याल ४ नम्बर प्रदेशबाट प्रतिनिधिसभामा निर्वाचित एक मात्र महिला हुन् । महिलाले पार्टी नेतृत्व गरेकै कारण स्याङ्जामा महिला नेतृत्व विकास सम्भव भएको उनले प्रतिक्रिया दिएकी छन् ।