झूटा बिल बनाएर २ करोड ६० लाख डलर ठगी: टेक्सासका क्लिनिक सञ्चालकलाई ९ वटा अभियोगमा दोषी करार
प्रकाशित मिति : ११ आश्विन २०८३, आइतबार
Photo by Tingey Injury Law Firm
अमेरिकी सेनाको स्वास्थ्य सेवा कार्यक्रममा २५ करोड डलरभन्दा बढी ठगी गरेको आरोपमा टेक्ससका एक मानसिक स्वास्थ्य क्लिनिकका सञ्चालक दोषी ठहरिएका छन्। आरोपीले ठगीको रकमबाट १ लाख डलरभन्दा बढी मूल्य पर्ने सुनको जलप लगाइएको टेस्ला साइबरट्रक लगायतका विलासी वस्तुहरू खरिद गरेको अभियोजकहरूले जनाएका छन्।
टेक्सासको फ्रिस्को निवासी ६४ वर्षीय केभिन डी. करीलाई फोर्ट वर्थस्थित सङ्घीय अदालतले दोषी ठहर गरेको हो। अमेरिकी जस्टिस डिपार्टमेन्टका अनुसार उनीविरुद्ध स्वास्थ्य सेवा ठगीका ३ वटा, गैरकानुनी कमिसन दिएको ३ वटा र आपराधिक गतिविधिबाट प्राप्त रकम कारोबार गरेको ३ वटा गरी जम्मा ९ वटा अभियोगमा दोष सिद्ध भएको छ।
अभियोजकहरूका अनुसार करीले प्लैनो र फोर्ट वर्थ तथा फोर्ट वाल्टन बीच मा मानसिक स्वास्थ्य क्लिनिकहरू सञ्चालन गर्दै आएका थिए। उनले ट्रान्सक्रानियल म्याग्नेटिक स्टिम्युलेसन थेरापीका नाममा आवश्यकता नै नभएका र धेरैजसो प्रदान नै नगरिएका सेवाहरूको झूटा बिल बनाएर सेनाको स्वास्थ्य कोष दुरुपयोग गरेका थिए।
परीक्षणका क्रममा प्रस्तुत प्रमाण अनुसार करीले ५५ लाख डलरभन्दा बढी गैरकानुनी कमिसन बाँडेर पूर्व तथा बहालवाला सैनिक र तिनका परिवारलाई अनावश्यक थेरापी लिन उक्साएका थिए। यसका साथै उनले आफूलाई डाक्टरका रूपमा गलत तरिकाले चिनाएको, अन्य इजाजतपत्र प्राप्त डाक्टरहरूको अनुमति बिना नै तिनको नाम र पहिचान प्रयोग गरी दाबी पेस गरेको र कर्मचारीहरूलाई झूटा मेडिकल रेकर्ड बनाउन लगाएको पाइएको छ।
उक्त क्लिनिकहरूले कुल २ करोड ६० लाख डलरभन्दा बढीको भुक्तानी दाबी पेस गरेकामा ट्रिकेयरले करिब १ करोड ७० लाख डलर भुक्तानी गरिसकेको थियो। करीले सो रकम विलासी होटलमा बसाइ, क्यासिनो-थिमको भव्य पार्टी र सुनको जलप लगाइएको टेस्ला साइबरट्रक खरिदमा खर्च गरेर मनी लाउन्ड्रिङ गरेका थिए।
अमेरिकी सहायक सरकारी वकील कोलिन एम. म्याकडोनाल्डले भने, “यी अभियुक्तले देशका सैनिक र तिनका परिवारका लागि लक्षित अति महत्त्वपूर्ण स्वास्थ्य सेवा कार्यक्रमको दुरुपयोग गर्दै करदाताको पैसा व्यक्तिगत मोजमस्ती र विलासिताका सामानमा उडाएका छन्।”
सरकारी वकील रायन रेबोल्डका अनुसार करीले सैनिक र तिनका परिवारको विश्वासमाथि गम्भीर विश्वासघात गरेका छन्। करीलाई पछि सजाय सुनाइनेछ। दोषी ठहरिएका ९ वटै अभियोगमा उनलाई प्रति-अभियोग अधिकतम १० वर्षसम्मको कैद सजाय हुन सक्नेछ।