प्रदेश दुईको मतदान सम्पन्न
प्रकाशित मिति : आश्विन २, २०७४ सोमबार
बिहान सात बजेदेखि शुरु भएको प्रदेश नम्बर दुईको स्थानीय तहका निम्ति भएको मतदानको कार्यक्रम साँझ पाँच बजे सम्पन्न भएको बताइएको छ।
निर्वाचन आयोगका अनुसार हालसम्म अधिकांश स्थलमा शान्तिपूर्ण रुपमै मतदान सम्पन्न भएका खबर आएका छन्। कतैपनि मतदान स्थगित गर्नु नपरेको आयोगले बताएको छ।
मतदान सकिएका स्थलहरुमा मतपेटिका व्यवस्थापन गर्ने काम भइरहेको बताइएको छ।
साँझसम्ममा ७० प्रतिशतभन्दा धेरै मतदाताले मतदान गरेको प्रारम्भिक अनुमान आयोगले गरेको प्रवक्ता नवराज ढकालले बताएका छन्।
अपरान्ह तीन बजेसम्म ६३ प्रतिशत मत खसिसकेको आयोगले जनाएको थियो।
मतदान सम्पन्न भएसंगै अब मतपेटिकाहरु गणनास्थलमा ल्याइ गणना गरिने प्रकृया शुरु हुनेछ।
सोमबार स्थानीय तहको तेस्रो चरण अन्तर्गत तराईका आठवटा जिल्लामा १३६ स्थानीय तहका निम्ति मतदान भएको छ।
त्यहाँ एउटा महानगरपालिका, ३ वटा उपमहानगरपालिका, ७३ नगरपालिका तथा ५९ गाउँपालिका रहेका छन्।
सो प्रदेशमा साढे २६ लाख मतदाता रहेका छन्।