अमेरिकी दूतावास काठमाडौंबाट डिभी २०२२ का विजेताको अन्तरवार्ता लिन सुरु
प्रकाशित मिति : चैत्र ९, २०७८ बुधबार
अमेरिकी दूतावास काठमाडौंले डिभी २०२२ का विजेताको अन्तरवार्ता लिन सुरु गरेको छ । मार्च २१ सोमबारदेखि अन्तरवार्ता लिन सुरु गरिएको अमेरिकी दूतावास काठमाडौंका कन्सुलर अधिकारीले भिसा च्याटमा जानकारी दिएका छन् ।
डिभी २०२२ का विजेताको भिसा गत अक्टोबरदेखि जारी गर्नुपर्नेमा अहिलेसम्म भिसा जारी गरिएको थिएन । आगामी सेप्टेम्बरभित्र भिसा जारी गरिसक्नुपर्ने प्रावधान रहेपनि झण्डै ६ महिनासम्म भिसा जारी नहुँदा डिभी विजेताहरु अन्यौलमा रहेका थिए ।
आर्थिक बर्ष सन् २०२२ का लागि गतबर्षको मे ८ मा डिभी लोटरीको नतिजा सार्वजनिक गरिएको थियो । अमेरिकी विदेश मन्त्रालयका अनुशार आर्थिक बर्ष सन् २०२२ का लागि ३८०२ जना नेपालीहरुले डिभी लोटरी पारेका छन् । जुन एसियामा नै दोश्रो हो । एसियामा सबैभन्दा धेरै इरानका ५७३९ जनाले डिभी पारेका छन् ।
बढीमा ५५ हजार डिभी विजेताहरुले भिसा पाउनसक्ने भएतापनि १ लाख १९ हजार २१ जनाले सन् २०२२ को डिभी पारेका छन् । उनीहरुमध्ये कैयन अयोग्य हुनसक्ने भएकाले अमेरिकाले भिसा दिने नम्बरभन्दा धेरैलाई डिभी पार्दै आएको छ ।
सन् २०२२ का लागि कुल ७३ लाख ३६ हजार ३ सय २ जनाले डिभी भरेका थिए । आफन्तहरुसहित सन् २०२२ को डिभीमा सहभागी हुनेहरु विश्वभरबाट कुल १ करोड ३१ लाख ९१ हजार २ सय ९६ जना रहेका थिए ।
अमेरिकाले डिभी २०२० र २०२१ का संरक्षित भिसाहरु जारी गर्न भने अझै सुरु गरेको छैन । डिभी २०२० र २०२१ का संरक्षित भिसाहरु अप्रिलभन्दा अगाडि जारी गर्न नसक्ने र अप्रिलपछिमात्र जारी गर्न सकिने अमेरिकी विदेशमन्त्रालयले बताएको थियो ।
गत डिसेम्बर ९ मा कन्सुलर सिस्टम एण्ड टेक्नोलोजी सीएसटीले बुझाएको रिपोर्ट अनुशार आर्थिक बर्ष २०२२ को डिभीमा कुनै नकारात्मक असर नपर्ने गरी २०२० र २०२१ का संरक्षित भिसा जारी गर्न केही समय लाग्ने उल्लेख गरिएको थियो । लेभलअ फ इफोर्टको विश्लेषण अनुशार उक्त तयारीका लागि कम्तीमा ४ महिना लाग्ने विश्लेषण गरिएको थियो ।
४ वटा विभिन्न मुद्दामा अमेरिकी अदालतले आर्थिक बर्ष २०२० र २०२१ का डिभी विजेताका भिसा संरक्षणको आदेश दिएको थियो । गोमेज मुद्दामा अदालतले २०२० का ९०९५ डिभी विजेताको भिसा संरक्षणको आदेश दिएको थियो भने गुडलक केसमा २०२१ का ६९१४ विजेताको भिसा संरक्षणको आदेश दिइएको थियो । त्यस्तै गोह केसमा डिभी २०२१ का ४८१ र राई केसमा डिभी २०२१ का ९९६ भिसा संरक्षणको आदेश दिइएको थियो ।