रोटरी क्लबले अमेरिकाबाट नेपाल पठायो दुर्गम क्षेत्रका लागि साढे २ लाख डलरका १० हजार चश्मा


प्रकाशित मिति : असार २५, २०७८ शुक्रबार

रोटरी क्लबले अमेरिकाको न्युयोर्कबाट साढे २ लाख डलर बराबरका चश्मा नेपाल पठाएको छ । दुर्गम क्षेत्रको ग्रामिण भेगका विपन्न समुदायलाई सहयोग गर्ने उद्देश्यले विभिन्न पावरका चश्माहरु नेपाल पठाइएको हो ।

रोटरी क्लब अफ न्युयोर्क क्वीन्सले रोटरी क्लब अफ महाराजगञ्जले प्राप्त गर्ने गरी १० हजार चश्मा र अन्य सामाग्रीहरु नेपाल पठाएको हो । रोटरी क्लब अफ ह्याम्प्टनबाट सन् २०१८ मा ३५ जनाको मिसन टिमले नेपाल भ्रमण गर्दा दुर्गम क्षेत्रका जनताहरुलाई चश्माको अभाव भएको देखेपछि सहयोगका लागि कदम चालेको थियो ।

प्रति चश्मा २० डलर पर्ने यी चस्माहरु आफूहरुलाई उपलब्ध गराइएको र यी चश्माहरु रोटरी क्लब अफ न्युयोर्क क्वीन्सको ४ हजार डलर खर्चमा नेपाल पठाइएको रोटरी क्लब अफ न्युयोर्क क्वीन्सका प्रेसिडेण्ट खाम भट्टले जानकारी दिए । यो मेगा प्रोजेक्टमा आफूपनि सहभागी हुन पाउँदा निकै खुशी लागेको र धेरै विपन्नहरु लाभान्वीत हुने आफूहरुको विश्वास रहेको भट्टले बताए ।

यी चश्माहरु साउथ ह्याम्प्टन रोटरी क्लबका सिन हेनरीले रोटरी क्लब अफ न्युयोर्क क्वीन्सलाई उपलब्ध गराएका हुन् । रोटरी क्लब अफ न्युयोर्क क्वीन्सका तत्कालिन प्रेसिडेण्ट नवराज केसी र रोटरी क्लब अफ महाराजगञ्जका डाक्टर जय टण्डनले समझदारीपत्रमा हस्ताक्षर गरेपनि कोरोना महामारीका कारण यी चस्माहरु उपलब्ध गराउनमा केही ढिलाई भएको थियो ।

यी चश्मा विगत १ बर्षदेखि रोटरी क्लब अफ न्युयोर्क क्वीन्सका वर्तमान अध्यक्ष खाम भट्टको घरमा राखिएको थियो । यी चश्माहरु आँखाका डाक्टरहरुको सिफारिसमा दुर्गम क्षेत्रमा वितरण गरिने जनाइएको छ । यो प्रकृयाका लागि रोटरी क्लब अफ न्युयोर्क क्वीन्सका निवर्तमान प्रेसिडेण्ट जनक भण्डारीले समन्वयकारी भूमिका खेलेका थिए ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com