लेखक राजन थपलियाको नयाँ पुस्तक ‘शतप्रतिशत जीवन’ अनलाइनमा
प्रकाशित मिति : जेष्ठ ४, २०७४ बिहीबार
चर्चित युवा लेखक राजन थपलियाको नयाँ पुस्तक शतप्रतिशत जीवन (100% LIFE) अब अमेजनबाट पनि किन्न सकिने भएको छ । लुलु प्रेसले प्रकाशन गरेको २ सय ८ पेज लामो यो पुस्तक एकसाता अगाडि बजारमा आएको हो । जीवन सिकाउने शिक्षकका रुपमा काम गर्ने यो पुस्तकको मर्मका बारेमा लेखक थपिलया भन्छन् आफैसँग प्रतिज्ञा गर्नुहोस्, तपाईको जीवन कहिलेपनि उस्तै रहनेछैन ।
अनलाइनमा ११ डलर ३२ सेन्ट मूल्य राखिएको यो पुस्तकमा कसरी शतप्रतिशत जीवन जिउन सकिन्छ भन्नेबारे सिकाइएको छ । न्युयोर्क निवासी चर्चित युवा लेखक राजन थपलियाले अहिलेसम्म झण्डै १ दर्जन पुस्तकहरु प्रकाशन गरिसक्नु भएको छ । सकारात्मक सोंच र आत्मप्रेरक पुस्तकहरु लेख्ने थपलियाको यो पुस्तक शतप्रतिशत जीवन अर्थात् हन्ड्रेड पर्सेन्ट लाइफमा जीवनबारे बहुउपयोगी शुत्रहरु समेत दिइएको छ ।
झण्डै १५ बर्षदेखि अर्थात् किशोरावस्थादेखि नै लेखनकार्यमा लागेका थपलियाका अप्रकाशित केही पुस्तकहरु पनि तयारी अवस्थामा छन् । थपलियाको लेखन सेल्फ हेल्प, मोटिभेशन र नोभलमा केन्द्रीत रहेको छ । उनी भन्छन् लेखनका विभिन्न धारहरु छन् । तर मैले महसुस गरेको छु कि यी धारहरु नै मेरालागि उपयुक्त छन् । उपन्यास लेखन र सेल्फ हेल्प नै मेरालागि उचित विधा हुन् ।
शतप्रतिशत जीवनबारे थपलिया भन्छन् – ‘यसको उपशीर्षकले नै सबै कुरा भनेको छ । आफैसँग प्रतिज्ञा गर्नुहोस्, तपाईको जीवन कहिलेपनि उस्तै रहनेछैन । तपाईले आफ्नो जीवनमा कसम खानुहोस्, प्रतिज्ञा गर्नुहोस् । हिजो जती गल्ती भए, कमजोरी भएपनि आगामी दिनमा राम्रो गर्न सकिन्छ । राम्रो गर्ने प्रतिज्ञा हुनेलाई १७ बर्ष र ७० बर्षको उमेरले पनि कुनै फरक पार्दैन । कुनै पनि बेला राम्रो कुराको सुरुवात गर्न सकिन्छ । काममुखी भएर अगाडि बढेमा जीवनमा धेरै कुरामा परिवर्तन ल्याउन सकिन्छ । आफूले आफैसँग प्रतिज्ञा नगरेको कारणले मानिस अफसल हुनेगर्छ । दुखी भएका र असफल भएकाहरुलाई पनि सही बाटोमा ल्याउने र परिवर्तन हुन चाहनेहरुका लागि लेखिएको पुस्तक हो यो ।’
