अमेरिकी राजनीति र राजनीतिज्ञसँग नेपाली समुदायलाई जोड्ने अभियानमा न्युयोर्कका नवराज

प्रकाशित मिति : भाद्र १८, २०७७ बिहीबार

न्युयोर्कको क्वीन्स कलेज प्वाइन्टमा श्रीमति र दुई सन्तानसहित बस्दै आएका नवराज केसी नेपाली अमेरिकन विजनेशम्यान र रियल्टरमात्र होइनन्, उनले केहीसमयदेखि अमेरिकन राजनीति र राजनीतिज्ञसँग नेपाली समुदायलाई जोड्ने काम समेत गरिरहेका छन् ।

उनी केहीबर्षदेखि नै यो अभियानमा सकृय छन् । तर कोरोनाको महामारीमा त्यसको प्रत्यक्ष फाइदा न्युयोर्कमा रहेको नेपाली समुदायले लिन सक्यो । उनको पहलमा कोरोनाको महामारीको बेलामा क्वीन्स बोरो, बु्रकलिन बोरो र न्युयोर्क सिटी मेयर अफिसबाट
नेपाली समुदायका लागि झण्डै १५ हजार मास्क, झण्डै ९ हजार ह्याण्ड सेनिटाइजर, झण्डै १२ हजार ग्लोभ्स प्राप्त भएको थियो ।

विभिन्न संघसंस्था र व्यक्तिमार्फत ती सामाग्रीहरु न्युयोर्कको नेपाली समुदायलाई वितरण गरिएको थियो । न्युयोर्कमा मास्क, सेनिटाइजर र ग्लोभ्सको हाहाकार भएको बेलामा यति धेरैमा मात्रामा प्राप्त सहयोगले नेपाली समुदायलाई ठूलो राहत मिलेको थियो ।

कोरोना महामारीमा नेपाली समुदायको सहयोगमा जुट्ने क्रममा नवराज

नवराज केसीले क्वीन्स बोरो, बु्रकलिन बोरो र न्युयोर्क सिटी मेयर अफिसबाट सहयोग प्राप्त गर्नका लागि सेतुको काममात्र गरेनन्, छुट्टै पहलमा थर्मामिटर र औषधीहरु किनेर नेपाली समुदायलाई वितरण समेत गरे । रोटरी क्लब अफ न्युयोर्क क्वीन्सका तत्कालिन अध्यक्ष समेत रहेका केसीको नेतृत्वमा क्लबका तर्फबाट ५ सय थर्मामिटर र १० हजार पोका ज्वरोको औषधी टायलोनोल नेपालीहरुलाई वितरण गरियो ।

केसी सन् २०१९ देखि सन् २०२० को जुनसम्म रोटरी क्लब अफ न्युयोर्क क्वीन्सका अध्यक्ष रहेका थिए । हाल उनी रोटरी इन्टरनेशनलको डिस्ट्रिक्ट ७२५५ मा एसिस्टेन्स गभर्नर रहेका छन् ।

महामारीको अवधिमा न्युयोर्क सिटीबाट प्राप्त ७ हजार ५ सय छाक तयारी खाना समेत उनकै पहलमा नेपाली समुदायलाई वितरण गरिएको थियो । न्युयोर्कको ज्याक्सनहाइटमा रहेको ब्याम्बो हाउस रेष्टुरेण्टको अगाडि उक्त खाना वितरण गरिएको थियो । केसी ब्याम्बो हाउसका संचालक समेत हुन् ।

सन् २००२ मा अमेरिका आएका धादिङका केसीले अमेरिकाको स्थानीय राजनीतिप्रति चासो राख्न लागेको धेरै भएको छैन । सन् २०१७ देखि स्थानीय राजनीतिमा चासो बढेको हो । त्योसँगै सन् २०१८ मा उनी क्वीन्स बोरो प्रेसिडेन्टबाट कम्युनिटी बोर्ड सदस्यमा नियुक्त भएपछि अमेरिकी राजनीतिज्ञहरुसँगको सम्पर्क र सम्बन्ध अझ बढ्यो ।

त्यसपछि नेपाली समुदायका कार्यक्रममा अमेरिकाका स्थानीय राजनीतिज्ञहरुलाई बोलाउने र नेपाली समुदायसँग सम्बन्ध बढाउनेमा उनी सकृय रहे । उनका पहलमा नेपाली समुदायका दर्जनौं कार्यक्रममा स्थानीय अमेरिकी राजनीतिज्ञहरु सहभागी भइसकेका छन् ।

आफूले रोटरी क्लबको कार्यक्रममा स्थानीय निर्वाचित अधिकारीहरुलाई बोलाउने गरेको र नेपाली समुदायसँगको सम्बन्ध विस्तारका लागि उनीहरु पनि इच्छुक रहेको केसीले बताए । स्थानीय काउन्सिल सदस्यहरुदेखि बोरो प्रेसिडेण्डसम्म नेपालीका कार्यक्रममा अतिथिका रुपमा सहभागी हुने गरेका छन् ।

नवराज सामाजिक न्यायका अभियानमा पनि सकृय रहदै आएका छन् ।

केसीको पहलमा बु्रकलिन बोरो प्रेसिडेण्ड एरिक आडम्स, न्युयोर्क सिटी काउन्सिल सदस्य फर्नान्डो कारबेरा, काउन्सिल सदस्य डोनोभान रिचार्ड लगायतका राजनीतिज्ञहरु नेपालीका कैयन कार्यक्रमहरुमा लगातार सहभागी भइरहेका छन् ।

फर्नान्डो कारबेरा ब्रोंक्सको बोरो प्रेसिडेण्डका लागि सन् २०२१ मा हुने चुनावका उम्मेदवार हुन् भने एरिक आडम्स सन् २०२१ मा हुने चुनावमा न्युयोर्क सिटीका मेयरका उम्मेदवार हुन् ।

डोनोभान रिचार्ड गत जुनमा भएको डेमोक्रेटिक प्राइमरीमा क्वीन्स बोरो प्रेसिडेण्डका लागि निर्वाचित भइसकेका छन् । डेमोक्रेटिक पार्टीको पकड रहेको यो क्षेत्रमा उनी अबको चुनावमा प्रेसिडेण्डमा निर्वाचित हुने लगभग निश्चित छ । रिचार्ड नेपाली समुदायका तर्फबाट गोर्खाली समाजले आयोजना गरेको रक्तदान कार्यक्रममा प्रमुख अतिथि भएर आउनुका साथै आफै रक्तदान समेत गरेका थिए ।

नवराज केसी स्थानीय अमेरिकी राजनीतिज्ञहरुका चुनावी अभियानमा पनि उत्तिकै सकृय रहदै आएका छन् । न्युयोर्क सिटीको मेयरका लागि डेमोक्रेटिक प्राइमरीका लागि उम्मेदवारी दिएका ब्रकलिन बोरो प्रेसिडेण्ड एरिक आडम्सको चुनावी अभियानमा उनी स्वयंसेवक हुन् । हरेक हप्ता झण्डै एकघण्टा हुने कन्फ्रेन्स कल बैठकमा उनी सहभागी हुँदै आएका छन् । नेपाली समुदायका तर्फबा केसीका साथमा झण्डै ६५ जना स्वयंसेवकका रुपमा खट्दैछन् ।

अमेरिकी सांसद जोसेफ क्राउलीको चुनावी अभियानमा पनि नवराज झण्डै तीन महिना स्वयंसेवकका रुपमा खटेका थिए । चुनावी अभियानमा घरघरमा पुग्नेदेखि फोनकलगर्नेसम्मका गतिविधिमा उनी सहभागी भएका थिए । त्यसै अवशरमा हाउस स्पीकर न्यान्सी पेलोसीसँगको भेटघाटको अवशर समेत जुरेको थियो ।

हाउस स्पीकर न्यान्सी पेलोसीसँग नवराज

न्युयोर्क सिटी काउन्सिल सदस्य डानियल ड्रमदेखि न्युयोर्क राज्य सिनेटर जेसिका रामोससम्मको चुनावी अभियानमा उनी सकृय भए । त्यस्तै राज्य सांसद क्याटालिना क्रुजको चुनावी अभियानमापनि उनी सकृय भए । यसरी चुनावी अभियानमा लाग्दै गर्दा केसीको अमेरिकी राजनीतिप्रति चासोमात्र बढेन, अमेरिकी राजनीतिज्ञसँगको सम्बन्ध पनि विस्तार हुँदै गयो ।

अमेरिकाको स्थानीय राजनीतिमा सकृय बन्दै गएमा स्थानीय सरकारका साधनश्रोतमा समुदायको पहुच कायम गर्न सहज हुने केसीको विश्वास छ । उनी भन्छन् – ‘नेपाली समुदायले आफ्नो तागत देखाउनसकेको खण्डमा अमेरिकी राजनीतिज्ञहरुको नेपाली समुदायप्रति चासो बढ्छ । यसबाट नेपाली समुदायलाई नै फाइदा पुग्छ ।’

नवराज केसी कम्युनिटी बोर्ड सदस्यमा नियुक्त हुँदा कम्युनिटी बोर्ड सदस्यमा नेपाली अमेरिकनको संख्या निकै कम थियो । अहिले ९ जना नेपाली अमेरिकनहरु क्वीन्समा कम्युनिटी बोर्डमा सदस्य रहेका छन् । कम्युनिटी बोर्ड स्थानीय राजनीतिमा सकृय हुन चाहनेहरुका लागि पनि आधार भएको विश्वास गर्छन् केसी । न्युयोर्कमा मेयर बिल ब्लाजिओपनि कम्युनिटी बोर्ड सदस्य हुँदै स्थानीय राजनीतिमा प्रवेश गरेका थिए ।

‘नवराज केसी डे’ कार्यक्रममा स्थानीय राजनीतिज्ञसँग नवराज

गत डिसेम्बरमा न्युयोर्कमा अमेरिकन राजनीतिज्ञहरुको उपस्थीतिमा नवराज केसी डे समेत आयोजना गरिएको थियो । सोही अवशरमा अमेरिकन सांसद ग्रेस मिङबाट हस्ताक्षरित प्रोक्लेमेसन समेत हस्तान्तरण गरिएको थियो । अमेरिकाको डुकेन विश्वविद्यालय पिट्सबर्गबाट ग्लोबल लिडरसिपमा मास्टर्स गरेका केसी भन्छन् – ‘अब अमेरिकाको स्थानीय राजनीतिमा अगाडि बढ्ने योजना बनाएको छु ।’

KHASOKHAS EDITORIAL TEAM

Editor-in-Chief : Kishor Panthi
Deputy Editor-in-Chief : Ashmita Khadka
Executive Editor : Anil Adhikari
English Editor: Rajan Thapaliya
Editor: Deepak Pariyar
Editor (Business/US Politics) : Suresh Shahi
Multimedia Editor/Presenter : Kiran Marahatta
Europe Editor: Hari Krishna Panthi
Online Editors: Suraj Ghimire, Bikram Khatri, Aashish Khanal, Dikshya Panthi
Chief Photographer: Dipendra Dhungana
Editor (Empowerment) : Sapana Pariyar

KHASOKHAS TEAM

Int. Representative: KP Neupane(Jackson)
Resource Person: Bishwa Bahadur Shah
Goodwill Ambassador: Yam Baral

Contact Us

© 2021 KHASOKAHS. All Rights Reserved. Namaste International Media Group (worldwide) and Namaste Media Inc (USA)
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com